Dizzertieds en doomoals
Algemeen’t Lik d’r good noa dat ’t duurgeet. Dat alle ofdelingen van Concordia en ok ’t Theater Sonnevank goat verhuuzen noar ’t oale paand van V&D (nich dat op het Van Heekplein mear dat nog oalere an de Hengelosestroat).
Alleen ’t mooie ‘Bonbonniere’ Theater Concordia an de Oale Maarkt dat blif doar vanzölf. Dee leu hebt temet n’n ruumte um al heur aktiviteiten op n’n woardige wieze oet te voeren en dat allemoal bie mekaar in één gebouw. Ik deank dat alle leu dee zik gangs hoalt met Concordia en de Sonnevanck d’r onmeunig bliej met bint.
Oawer dat oale pand van Vroom en Dreesman kan ik oeleu nog wal ’n biejzeunder vertealsel doon. Dat stamt oet de tied van ’n lesten oorlog.
Dootieds zit ik op de bewaarschool biej zuster Pecomia in Het Laarinksticht in Eanske (dat is neerzet in 1911). Doar geaft de zusters van Oonze Leve Vrouwe van Amersfoort oonderwies. Doar loopt wie elken dag noar too, mien iets oaldere zuster dee op de grote school in de buurt zit en ik.
As wie op n’n woensdagmiddag van mien mooder allebei een kwartje kriegt loop ik met mien zus noar de oale Vroom & Dreesman in Eanske. Dat was biej ’t kruuspeunt De Graaff.
‘Onmeunig lekker ies’
Doar heb ze n’n oonder etazie veur het spölgood mear ôk n’n lunchroom woar as iej onmeunig lekker ies kunt halen. En doar goat wiej d’r veur hen. Mear as wiej doar in den kealder roondkuiert hef d’r ’n zwoar bombardement plaats in Eanske en goat alle lichten biej V&D in de kelderruumte , mear ôk in de hele stad, oet.
Umdat d’r biej de V&D in dee oonder etazie gin daglicht is wodt het stikke doonker en kunt wiej geen haand veur de ogen zeen.
Wiej kroept oawer de glassplinters alle kaanten op en noa ‘n kwarteerke bint wiej biej de oetgaank en wodt ’t weer lecht.
Maer de bombardementen goat slagmoals en nich zo zuunig vedan en wiej kniept ‘m natuurlik as mear wat, dat ku’j begriepen. Toch wilt wiej noar hoes op an en loopt sliepstettend dee kaant op.
Zo now en dan vlög oons wa wat um de oren hen. Wiej kompt veurbiej Het Laarinksticht waor as ik op de bewaarschool zit. Ik zeg teagen mien zus: “Ik vroag of wie doar dörvt schoelen tot ’t bombardement veurbie is”.
Noadat ik an heb belt keumpt d’r n’n non an de deur en dee zegt as ik miene vroage heb doan: “Jullie kunnen hier niet naar binnen, loop maar gauw door en ga maar snel naar huis” en zee klapt de duur too! Oawer de baarmhertigheid van dee leu kreeg ik too al een raar geveul!
Wiej goat met de billenwage kroepend op hoes op an en goddaank komt wiej zoonder grote schaa (wat schrammekes hier en doar en nen smerige bokse) biej oons mooder dee huult van plezeer daw d’r wier bint.
Maer ’t blif oe vanzölf aaltied biej en kwietworden dooj ’t ôk nooit nich. Ôk nich noa meer as 75 joar doarnoa.
Dee nonnen bint ok al ‘n heel zetke nich mear in Het Larinksticht. Doar doot now de leu van De Wonne heure bedrievigheden.
Tinus Kroeds
(t.kroeds@gmail.com)
Column Tinus Kroeds
