Dialectmaand

Tis lente. En tis meert. Meert roert zien steert, zeit ze oltied, ma meert is ok dialectmaand. En dit keerlke hef op disse plek a meer as doezend stukskes skreemn ma nog nooit int Twents of iets wat d’r op lek. Ie kunt ut ok steenkooln plat neumn. Makket mie niks oet. Meer as zien best kan dit keerlke nig doon. Ma lastig ist wa. Ik word dur nun betke sloerig in de rakkert van. En ak in de lucht kiek zie ik nun skoer reegn ankommn. Doar heuf ie gin Pelleboer veur te heetn.
En van dat brommers kiekn, doar was ik vroger wel nun leefhebber van as ik eerluk bin. Dat platproatn das mie opt Ribbelt en de Laares met de papleppel ingottn. En ik bunt nig verleerd al zeg ik ut zelluf.
Ma plat skriemn is nun onmeunig hels karwie. Bienoa net zo skeer as pennelties nemn. Joa, ik heb noar Oranje teegn die Spanjolen kekkn. Dat die spullers van oons metzingt met ut volksleed is totdoaranto maar met dat Wilhelmus mut wie rap stopn! Hept ze ut oawer de keuning van Hispanje! Nig good wies! Maak d’r Malle Babbe van of veur mien part Jan Klaassen was trompetter, ma kap met dat Hispanje.
En kap ok es met dat genuil oawer die pennelties dat dat nun lotterie is. Slöt nargns op. Ast nun lotterie sol wean, dan haddn wie veule moalen vaker sun serie wunn’n. Dan wast fiftyfifty wes deur de joarn hen. Ma wie hept veule moalen vaker verloorn dan wunn’n. Heul mangs wint wie. Wie kunt d’r gewoon niks van, penneltieskeetn. Doar mut gewoon meer op treent wordn. Dan kriej nun vaste trap. En de kiepers word er dan ok better van. Den kieper van Spanje was gewoon better dan dee van oons.
Noe hak nog nun uutsmieter willn doon, maar de ruumte is vot. Ajuus. En geluk inntuk.

Hans Assink schrijft sinds 2007 via Tekstbureau Piet. Piet staat voor Passie In Elke Tekst. Zijn eerste column in Huis aan Huis is van januari 2003. Zijn onlangs verschenen sprookjesboek Krentenbrodenbomen is te bestellen via assink@home.nl en ligt bij Boekhandel Broekhuis en DWF Media in Boekelo. 

Column Hans Assink