Veerbeeden en oontzeggen

Wat dörvt wiej in eenmoal völ nich meer. ’t Keump nich vrömd vuur mear ’t is toch wal oonverzeens op oons ofkommen. En dat almoal umdat d’r wier n’n niejen koronavariaant binnen is kommen. Lokdouwn, woarin wiej op n’n heeln hoop dinge kort wödt hoalen.
En dat almoals um oons noa verloop van tied wier ’n betke rechttoo rechtan te kunnen loaten doon.
As wiej d’r oons almoals an hoalt dan deank ik dat wiej ‘t toch ’n moal kloarspölt um wier met mekaar oardige en plezeerige dingen te doon.

Mear d’r bin ok leu dee zik d’r nich an hoalen wilt. Dee veend dat allemaol mear kwakeriej. En dee zölfs de leu, dee oons anroad oons an de reagels te hoalden, op n’n gloepens miserabele wieze daal haalt. Of zölfs de grepe too hoalt of nog earger, ’t leaven wilt benemmen.
Ai’j dat doot dan bi’j toch van ’t pot ofrukt. Zollen dee leu nich in ’t verstaand kunnen kriegen dat d’r onmeunig völ leu, allenig in oons laand al, an dissen korona zeekte oet de tied bint kommen en nog meer leu zo zeek bint wörden, dat ze eur hele leaven d’r wat van oawerhoalt?

‘Da’j eargens teagen bint dat kan gebuuren’ 

Dom en döllig veend ik dat, tenmeestens dat is miene mening. Da’j eargens teagen bint dat kan gebuuren. Dat bin ik ok wal ‘ns. Mear dan proat ik doar oawer en goa gin veanster insmieten en auto’s in de braand stekken en politie leu angriepen. Ik veend ’t prutvölk en ik deank dat ik doar nich allenig in stoa.

En dan nog efkes wat aans. Vergangene zundag is in Afrika bisschop Tutu oet de tied kommen. Neegntig joar is hee wörden. ’n Poar joar terugge was hee biej FC Twente um ziene stichting, dee in oons laand geald bie mekaar probeert te kriegen, an de man te brengen.
Op ’n tweede karstdag schrif Gerben Kuitert doaroaver in ’n digitale Bants. Hee schrif dat doar onmeunig völ geald an ’n striekstok blif hangen. Veur de sjeu wörden hee biej den wedstried van FC Twente teagen Heerenveen umstaandig in ’t zunneke set en hee har d’r zölf, zo te zeen op ’n filmke dat d’r biej steet, völ plezeer an.
D’r steet zölfs ’n portret biej dat hee Felipe Gutierrez oawer ’t gat hen strik um ‘m geluk too te wunsken. Ok steet d’r in dat vertealsel biej dat Joop Munsterman ‘m nog ’n moal 50.000 Euro zal too schikken, maer of dat oet is kommen wilt ze nog noakieken.
Zoas d’r wal mear dingen nich oet de vearf bint kommen dee ’n doomaolige vuurstaand in de mus har.

Erelid van ’n klub of verening kuj wörden ai’j oe joaren lang drok hebt maakt as vriewilliger.
Da’j oe ’t vuur oet de sloffe hebt loopen um de zake op de been te hoalden. Mear nich ai’j nooit nich wat hebt doan en zölfs nich wet dat de klub of verening besteet.
Mear den Bisschop Tutu oet Afrika wörden erelid. En dat was, zo schrif Gerben Kuitert, biej n’n bölt leu “in ’t verkeerde haalsgat schötten”. Ik ken d’r doar ok wal ‘n poar van!

Onmeunig good en gezoond 2022.

Tinus Kroeds

Column Tinus Kroeds