Da’s wier vuurbiej
Algemeen’t Is oflopen. De Dialektmoand meert 2022 is an zien end kommen. Now mut wiej wier wochten tot tooken joar as de wier umstandig andacht keump veur oonze moodertoal.
Ditmoal wörden d’r doanig oetpakt deur heel völ leu. Biej RTV Oost köj elken dag wat heuren oawer oons mooie dialekt. ’t Begun doar al vrog smons met Tweanske weurde dee roaden meusen wörden duur de lusteraars en dat was best oardig um an te heuren mear ok um an met te doon. Wieders wörden d’r völle dialekt muziek ofspölt met heel mooie leedkes en op de tellevisie wörden d’r ok slagmoals leu oetneudigt dee ’n proatken maakten oawer het Nedersaksich dialekt.
Jammer dat ‘t noe klabats opheult. ’t Zol mooi wean as d’r ok boeten de dialekt moand um meertieds wat niejs zol wörden bracht oawer oonze alderbastens mooie moodersproake. Mögelik keump dat nog wal de tooken tied.
‘Brödkes op de baand’
Mear ok de kraanten hebt vaak genog andacht geaven an het dialekt. Ze schreven oawer de stae- en dorpname dee neungst de Nederlandse name ok de name in het Twents dialekt op de brödkes d’r biej too zöln zetten. Vergange wekke heb wiej in disse kolomn d’r ok andacht an geaven met pleatkes d’r biej. Mear ok stun d’r ’n vertealsel in ’n Bans oawer n’n supermaarkt in Boorn dee ‘beurtbrödkes’ biej de kassaas hen zetten.
Dat bint dee brödkes dee’j achter an de bosschoppen zet ai’j alns op de baand hebt daallegt. En op dee brödkes stoat Twentske zegsels en aandere leuke dialekt weurde zoas ‘dreuge wors in ’n koar?’ en völ meer van dee leuke weurde woar as ie um mut glemlachen ai’j biej de supermaarkt mut ofrekkenen. Een onmeunig oarig bedeanksel van ’t Twente Hoes oonder zeggenschop van Adri Hemmink.
En datzölfde Twente Hoes (dat zit in ’t Kultuurhus Borne an de Markstroat 23 in Boorn) bödt aandere supermaarkte an um ok van dee brödkes biej heur te bestellen. ’t Zol onmeunig mooi wean as d’r in heel völ supermaarkte biej de kassas van dee brödjes stoat.
Biej ’t Twente Hoes bint ze toch wal doanig drok met allerhaande zaken dee met Twente en ’t dialekt van doon hebt. Een van de dinge dee zee te gang hebt bracht is de oetgave van een blad veur keender van de leagere school.
Het het ‘Wiesneus’ en is d’r veur maakt um de keender ok wat meer biej te brengen van ‘t dialekt oet oonze contreie. Biej dat Twente Hoes köj van alns te wetten kommen oawer de kultuur en de sproake van Twente.
Wel zik doar ok drok vuur maakt is ‘De Kreenk veur de Twentse Sproak’. Dat is n’n verening dee al meer as vieftig joar besteed en heel völ döt vuur de kultuur en de sproake.
Dee hebt vaak genog ’n mooi blad (’t het ‘Bodbreef’) woarin onmeunig völ niejs en vertealsels stoat dee deur meerdere leu wödt schreven en dat wödt tooschikt an de leden. Beide hebt n’n webstea waor van alns te veenden is oawer wat zee allemoal an ’t doon bint. Kiek d’r mear ’s op. Door hoof iej nich met te wochten tot ‘n dialektmoand van tooken joar!
Goodgoan allemoal.
Tinus Koeds
(t.kroeds@gmail.com.)
Column Tinus Kroeds
