Van alns wat…

Dee berichte oawer de gemeente Holten-Riessen, oawer n’n vuurslag um op de brödde van de stea- en doarpname de naam in ’t dialekt d’r biej too te zetten hef nogal wat teweeg brach.
D’r waren eankelden dee ’t niks veunden mear ’t meeste part was d’r wal entoesiast oawer. Ik kreeg ok wat reakties en een doarvan wil ik oeleu nich onthoalden.
’t Wörden miej tooschikt duur Patricia Oortman. Zee schreef: “Ik veend ‘t ’n supergooden inval! Wiej dörvt greuts wean op oonze heerkomst en oons o zo schiere dialekt. ’t Zol spietig wean as dit verloorn zol goan. Also doar woar ’t möggelik is, dörv ’t gewis publiceert wörden. Met vreandelike grootnis, Patricia”. (Patricia schreef miej in ’t Nederlaands, ik heb ’t umzet in oonze moodersproake). Dat lög d’r also nich num. Zo bint d’r völ meer leu dee ’t mooi veend dat de laatste tied völ andacht wörd geaven an de Nedersaksische sproake. En dat is toch ok góód.
Oaweral in oons laand wördt d’r dialekte sprökken en dee wördt doar ok in eern hoalden. Woarum zult wiej in oonze kontreien d’r dan gin andacht an geaven. De Grönninger, Freesken, Dreanten, Achterhookers, in Zeelaand, in Broabaant, de Limburgers mear ok de leu in de Randstad proat völ dialekt en aans wal met ’n aksent. Woarum zollen wiej d’r dan nich met duurgoan? Zekers wal, doon heur! ’t Verstearkt de Noaberschop!.

‘n’n muurke ofbrekken’

Ok dee anhaank van FC Twente oet vak P wollen wal wetten dat zee hier oet de kontreie koompt. Biej de wedstried teagen PEC Zwolle loat zee ’n spandook zeen met doarop: ‘RARE JONGS, DEE TUKKERS’ en dat mean zee in de goode zin van ’t woord.
En biej de topper teagen PSV hebt ze zik onmeunig drok maakt. Doar waren duur ’t hele stadion rooie en witte papierbladen oetdeelt en dee heulen de leu allemoal, vuur at ‘n wedstried begun, in de heugte. En dan kwam d’r ’t volgende oet: ‘VALLEN EN WIER OPSTOAN, TWENTE KEUMP D’R AN!’ (ik heb ’t umzet in dialekt).

En dan was d’r ’t lösdoon van dee onmeunig grooten bouwmarkt van Hornbach in Eanske. Doar meus burgemeeste Roelof Bleeker n’n muurke ofbrekken um ’n ingaank lös te maken (ik goa d’r wal van oet dat hee in ’n tookem tied meer geet opbouwen dan ofbrekken!).
Mear ’t ludieke veend ik toch wal dat dee kollega-bouwmarkt Bauhaus oet Hengel met n’n bladzie groote advertentie in de kraant reageern. Doar stun in: MACHTIG MOOI DAT TWENTE, OF NICH HORNBACH? En dat veend ik alderbastens good veunden van dat Bauhaus. Ik wil d’r mear met zeggen: ok hier wörd wier n’n leenk leg noar oonze strekke.

Wat ik ok kolsaal mooi veend is wat de supportersclub van FC Twente oet Maarkel hef doan. Zee waren 25 joar oald wörden en door wollen zee wat ampart veur doon.
Dat gung gebuurn, duur vanof Maarkel n’n plezeerboot te loaten vaarn noar De Grolsch Veste in Eanske met alle 250 leden an boord. Dat was vergangene zoaterdag.
Komplemeante vuur dee leu oet Maarkel. Zo köj mear weer zeen dat ‘t Noaberschop in onze kontreie nog aaltied boavenan steet. Stoan loaten, toch?

Mooie Poasketied too wunsket.

Tinus Kroeds
(reakties: t.kroeds@gmail.com)

Column Tinus Kroeds