Bas van ‘t pad of

Oonze eigenste Bas Nijhuis is ’n betke van ’t pad of. In plaats van dat hee zik ’t betke biej ’t fluiten hoald van voetbalwedstrieden, döt hee doarneungst ok noch völ aandere dingen zoas met doon an de telvisie en radio en kwaod wean op zikzölf.
D’r schient n’n reagel te wean dat scheidsrechters, dee geerne in Europa wilt fluiten, zik nich met al dee aard dingen mut gangs hoalden. Toch döt Bas dat en is hee hellig dat ’t gin wedstrieden gef vuur ‘m in Europa. Joa, mag wean dat ‘t eargenswoor zo’n nich belangrieke tweestried gef mear doar bedaankt oonze Bas vuur.

Ok was hee vergangene wekke hellig too hee biej den westried van Feyenoord teagen Heracles duur de VAR d’r op ansprökken wörd dat hee nich had zeen dat d’r n’n spöller wat kwoardoardigs had doan woar hee vuur had mutten fluiten. 

‘Achterof mu’j doaroawer nich meer hellig wörden’

Dat döt hee dan en gung den goal alsnoch ofkuren. Later wörd hee doar hellig oawer dat hee dat doan hef. Helemoal nich good natuurlik. Dan had hee dreks mut zeggen dat hee doar nich vuur ging fluiten. Achterof mu’j doaroawer nich meer hellig wörden.

’t Is toch vanzölf natuurlik da’j duur al disse en aandere dingen te doon dee niks met ’t scheidrechteren te doon hebt nich populair bint biej oewe vakbreurs van hoog töt leag.

Dan nog wat aans:

Wiej zit natuurlik al n’n onmeunige lange tied met dat coronavirus te knooien. Nich allenig biej oons in ’t laand mear oawer de hele weerld is d’r mangs alteroasie. En dan koomp d’r van alle kaante leu dee meant dat ze d’r verstaand van hebt. Nieje virologen lik ’t wal. Wel zik d’r ok teagenan bemeuit bint deen leu van Veronica Inside. Dat gebuurn ok vergangene moandag 29 november. Boavenal van der Gijp wus ’t almoals zo good. De man, dee van zien hele leaven alleen meer hier en doar hef voetbalt en doarnoa, zoas hee zölf zeg, in ’t hoes op de baanke ligt, mangs efkes de sauna in geet en wieders alns bekik vanof de baanke op tilvisie. Den is now klabats viroloog, tenminste in wat hee doar reup:

….“Zee bint d’r op oet um alman ’n betke tevree te hoalden. Wat zol now ’t alderbeste wean um dat aandere virus nog efkes boeten de duur te hoalden? Da’s op slot doon. Dat döt Japan, doar keump d’r gin ene meer in, Israel doar keump d’r gin ene meer in. Loat wiej ’t now per wekke bekieknen. Loat wiej now oawer dree wekke kieken waor as wiej stoat, mear um now awier te goan roopen: Dee dree wekke bint nich genog. Nich doon deank ik, hoalt oene bek too, joh. Loat wiej dit now gewoon per wekke, per wekke, bekieken”…. (hee reup dat in plat Rotterdams, nich op zien Twents natuurlik!)

En ok den man met dat caviaheufd röp van alns woar as hee nooit vuur duur hef leart. As d’r ene alns tot de groond too ofbrekt en leu de groond in trapt dan is hee ‘t wal. Dee leu könt zik better gangs hoaln met datgenne waor as zee ‘n betke sjoege van hebt: voetbal. Vuur ‘t veerdere könt wiej alns ‘t beste oawerloaten an de leu dee d’r sjoege van hebt.

Goodgoan.

Tinus Kroeds

Column Tinus Kroeds