Nich wier doan

Vurige wekke ging ‘t oawer ’n leidsman van dee voetbalwedstried in de Grolsch Veste biej FC Twente teagen Willem II. Dan zo’j zeggen loat ’t doar biej blieven. Mear ’t was zo aanders as gewoon, dat ik d’r ok nog wal iets oawer kwiet wil. Wat doar gebuuren was vanzölf nich good, wat het, ’t was schaandelik. Zo goa’j absloet nich um met oewe gaste. Waant dat is n’n leidsman. Hee deu n’n bult nich good, mear dan mu’j ‘m nich ’n pokkel vol schealden. Den man keump d’r hen um met alle leu dee d’r bint n’n gooden naomiddag tied te beleaven.
Mear ’t leup ‘m kats oet de haand. Hee deu n’n bult rare dingen en dat veul aaltied nich oet in ’n vuurdeel van de klub oet De Veste. Mear dat is noch ginnen groond um ‘m de hoed vol de schealden.

Stelt oe ’ns vuur da’j zölf eargenswoar bint en d’r is d’r ene dee begeent met oe te bakkeleien. Dan bakkelei ie terugge en dat kan mangs wal is in ’t hoonderd lopen. Mear dat heb ie dan zölf in de haand. Zunnen leidsman dee vanof de tribune van alns noar ’n kop hen krig den zol ok geerne dee tribune opgoan en al dee leu dee doar stoat of zit te schealden n’n döanige striekert an de lippe geaven.
Mear dat kan hee nich. Wat deankt hee dan? Ik krieg ze wal op n’n aander wieze terug. En hee nemt besloeten dee in ’t noadeel bint van de klub van dee leu dee stoat te daazen teagen ‘m. Dat mut de leu toch begriepen. Hee döt ’t zölfde as ie zöln doon a’j ‘m liek in de oogen zöllen kieken.

Slagmoals ku’j hören dat de ‘supporters’ van FC Twente de besten bint. En dat is ok mennigmoal terechte. Zee zingt zik de göale roew, zee smiet de ene noa de aandere anmeudiging d’r oet, zee hebt slagmoals onwies schiere en grote spandeuke en vlaggen, n’n gloepens grote groepe geet met noar oetwedstrieden en doar loat ze ok aaltied van zik heuren. Mear al mooiïgheid wördt in eenmoal an ’n diek zet deur dee domme sprekköre biej énen wedstried. En ie mut d’r nich van opkieken dat d’r eerdaagns n’n breef biej FC Twente in de busse koomp van de KNVB woarin ze bod doot dat de klub n’n döanige boot an ’t gat krig. En dat is noe net wat ze doar an ’t Colloseum nich könt broeken. 

In de beuke steet dat ‘supporting’ (’t keump oawer oet Engeland) betekent: ‘ondersteuning’ (in ’t Tweants: wat weend in de rugge geaven). Noa wat d’r op 17 oktober in de Veste is gebuurt kö’j nich mear proaten oawer supporting. Dat was ’t umgekeerde.

Loaw hoppen dat ’t duurdringt biej den groten koppel, dat ze met dat schaandeleren meer kapot maakt dan dat ze de klub ‘de weend in de rugge geaft’.

’t Heugt miej noch, dat d’r in 1977 n’n aktie heffe wes met ’n leedke woarin de röpe: gin geweald roond ’t veald, gin gemier meer met bier, gin gein in de trein, gin gesmiet biej de stried, hoal ’t kaant, waant wiej wilt toch dat voetbal nich kwiet. Dat was ’n vynil pleatke waor as aan de achterkaant dat leedke stun van ‘zo goat wie zundaagns op pad’…… Hoalt ’t doarbiej in ’n tookomst.

Tinus Kroeds

MB (Möj Begriepen): Vergangene zundag gung ‘t ‘n stuk better. Teagen N.E.C. wörden de spöllers zowat ‘n heeln wedstried anmeudigd en toozongen. ‘t Hef allen nich hölpen waant ze kregen ‘m an de bokse. En oawer ‘n leidsman was niks te klagen.

Column Tinus Kroeds