Column Tinus Kroeds: Oonderkommen

Maria op n’n ezzel en Joseph, n’n timmerman, leup d’r neungst. Dat is 2021 joar terugge. Zee möt n’n eand lopen en kleain um zik eargns op te geaven dat ze d’r nog bint. Tut wied in ’n oavend kleait ze verdan en dan wilt ze geern eargns n’n sloapstea hebben, zee bint oonwies meu.
Mear d’r is neerns n’n stea veur heur. Ze koomp terecht in n’n schoppe waor ok n’n ossen is.

Dat is ’t vertealsel dat is oawerbleeven oet de oaverleavering. Iej mut de tooken dage mear ‘s kieken op tv oost waor as dat plezaante filmke van Herman Finkers veurbiej koomp: Kroamschudden in Mariaparochie.

‘De stea waor Ankie wonnt’

Ik meus doaran deanken too vergangene wekke den dwingenden bosschop kwam van Ankie Broekers-Knol dat wiej hier in Eanske op ’t vleegveld 500 asielzeukers möt hendoon. As d’r leu in nood bint mu’j ze, as dat meuglik is, helpen, mear 500 in eenmoal is wal ’n luk völ. En ’t mut natuurlik leu in nood wean en gin gelukzeukers, doar heb wiej d’r zölf genog van.
Dat keunt d’r ook wal wat meender wean. D’r keunt d’r ok wal 200 terechte in den grooten Sporthal Tetterode in Overveen, de stea waor as Ankie-Broekers Knol wonnt. Dat is biej Bloemendaal, de staea woar as nogal wat ‘dure’ leu wonnt.

Op’t vleegveld zovöl vrömde leu hennzetten is wal ’n luk völle. Ze hebt doar mooie, kaante fiets- en waandelroutes henlegt waor as ‘t röstig en kaalm teumen is. As doar 500 leu komt te wonnen is de röst veurbiej. En den oetbater, dee van de vroogere vertrekhalle van ’t vleegveld wier ’n plezaant restaurant hef maakt met doarboeten ‘n schier terras, zit deank ik ok nich te wochten op vrömde leu dee, umdat ze aans niks te doon hebt, biej ‘m op bezeuk koompt.
En datzölfde geald ok meugelik wal vuur Marcook’s, wiederop biej ‘n ingaank van de fiets- en waandelroute. As d’r evenementen wödt hoalden met völ toolop dan mu’j nog meer ofwochten of dat allemoal akkedeert met dee nieje gäste.
Kan miej vuurstellen dat d’r hier en doar wat twiefels bint oawer dissen grooten umslag. Wiej mut ’t allemoal meer ofwochten. Zee zegt dat ’t meer vuur ’n half joar is, mear dat is toch nog wal n’n langen tied, zekers as ’t temet vuurjoar wödt.

Dan wil ik ‘t nog efkes oawer voetbal met oeleu proaten. En dan benaamd oawer den kieper van Twente. ‘t Wödt natuurlik de heugste tied dat den traener van De Mannschaft, Hans-Dieter Flick, n’n oetneudiging schikt an Lars Unnerstall en ‘m neugt um te spöllen vuur Duutschlaand.
Oonzen Lars is in de veerste verte völ better dan den kieper van um, Manuel Neuer. Tjonge wat kan dat jong de ballen teagenhoalden. Hee wont kortbiej Eanske, in Ibbenbüren. Hee heurt alzo eanliks wal ‘n betke biej oons Tweantenaren en Nederlaanders. Mear hee kan nich vuur oons laand spöllen umdat hee oet de Pruus koomp, aans wus ik ’t wal.
Vuur De Mannschaft zol hee ’n beste wean dee d’r in dizzen tied is. Kom op Flick. Neug ‘m oet. Ai’j zien woonstea nich wet te veenden, keunt wiej oe wal helpen.

Bliede en röstige feestdage wunske ik oeleu.

Column Tinus Kroeds