Mot ’t d’r oawer hebben

Aaltied oawer dat voetbal proaten is natuurlik nich de bedoling mear dizze moal kan ik d’r toch nich oonderoet. D’r is de vergangene wekke zovöl gebuurt, nich allenig in Eanske, mear ook in de buurt en wieders vort, dat ik een porsie van disse kolumn ’t d’r toch oawer wil hebben. Vuureerst was door vergangene woensdagoavend den wedstried in De Grolsch Veste. ’t Gung an met ‘t onmeunig angriepende eerbeteun an Jody Lukoki. Keerl, dat grip oe echt achter ‘t vessie. Wat hadden ze dat alderbastens mooi op touw zet. 

En doo mus de knoppe umdreait worden. D’r was ok nog n’n wedstried. En wat vuur ene. Winnen met 3-0 van FC Groningen en dan ’n kerteer wochten hoo of ’t d’r in Utrecht was angoan. Doar kwam in de letste minute ’t niejs vandan dat geunstig was vuur FC Twente en doo was d’r gin ene mear te hoalden.
Wat ’n feest wörden dat doar. ‘FC Twente geet Europa in’ zung elkeen dee d’r biej was en dat gung ’n heel zetke duur.
Vergangene moandagaovond wörden ‘t biej ’t stadion nog ’n moal vanniejs oawerdoan. En zundag ok nog ’n moal triomfaal terug kommen oet De Kuip in Rotterdam. Onmeunig good doan allegaar doar in De Veste.

‘Oonverwochte oetslagen’

Mear d’r waren d’r nog meer blieje. Oonverwochte oetslagen oaweral in ’t laand. Biej Fortuna en Sparta was d’r een en al bliejheid umdat zee in de ere divisie dörvt blieven en biej Heerenveen ok umdat zee nog dörvt woagen um Europees te halen.

Mear n’n bult droofheid was d’r in Tilburg (en n’n wekke vrooger) in Zwolle umdat Willem II en PEC kommende joar n’n klasse leager mut spöllen. Niks niejs vuur FC Twente waant dat gebuurn ok in Eanske n poar joar terugge en ok al ’n moal in 1982. Oonder zeggenschop van Marino Pucic en in ’n vurige eeuw oonder zeggenschop van Frits Korbach wörden alns in één joar wier terechte zet. Mear n’n bölt verdreet was d’r ok, dichter biej hoes, in Almelo.
Woar ze doar dachen dat ze met heur 34 punten d’r genog hadden um d’r in te blieven mut Heracles now nog een poar zwoare wedstrieden spöllen um ’t veage lief te redden. Loaw hoppen vuur heur dat ’t good geet. Dan heb wiej in alle geval tooken joar de derby wier terugge. ’t Kan best wean dat op ’t momeant dat ieleu dit least (woensdagoavend) Heracles an ’t worstelen is in Rotterdam teagen Excelsior um doar ’n good resultoat oet ’t veur te sleppen. Sukses d’r met.

’n Zetke wierum heb ik ’t met oeleu had oawer dee meziek in De Grolsch Veste. Dat doar wat leu nich helemoals tevreaden oawer waren. D’r was d’r ene dee neumen het ‘takkenherrie’. Doar heb ik nog al wat bescheed oawer kregen. Ene doarvan wil ik met oeleu delen. Dat kwam van ene Luuk en dee deu miej ’t volgende bod: Beste Tinus, Ik mot oe helemaol geliek geem. Wat un onmeunig rot herrie in de veste. Van mie mait ze dat direct ofschafn. Ut beste, Luuk.

Now Luuk, daankensweerd vuur oene reaktie. Ofwochten of d’r meer leu zo oawer deankt.

Goodgoan en ai’j eerdaags met vakaansie goat: onmeunig völ plezeer.

Tinus Kroeds (reakties: t.kroeds@gmail.com)

Column Tinus Kroeds