Gemeudelik drok
AlgemeenDe vergangene dagen en wekke was d’r wier völ reurigheid in oonze stea. De Poaskermis in Het Volkspark was d’r wier en doar kwamen völ leu op of. Het gung d’r doanig an too en d’r waren roem vieftig attrakties woar as jong en oald terechte dörven.
Dit joarenlaanke volksgebroek was d’r wier ene zoas ’t heurt te wean. En dan natuurlik de marathon van Eanske. Twee joar laank dörven ’t nich vanweagens dee korona mear dit joar was ’t wier voloet raak. Onmeunig völ lopers, nich allenig vuur de marathon mear ok vuur dee aandere ofstaande. Too ze biej oons vuurbiej kwamen heb ik vanzölf an de kaant stoan um te kieken.
Dee doonkere jongs dee vuuran löpen waren toch wal onmeunig rap. As n’n flits kwamen ze vuurbiej. Ie können ’t hoast noch of knipogen. Dee hele grote koppel dee d’r noa kwam har d’r van vot, in vergeliek met dee vuurste lopers, dat zee meer an ’t sloffen waren dan an ’t hardloopen. Mear dat sprök ja vonzölf.
‘Kipse of’
D’r leup ok ’n bleend vrouwmeanske met, wal met n’n begeleider natuurlik. Kipse of vuur dee prestatie. En d’r was ok ’n vrouwmeanske dat zik har anmeald vuur de vief kilometer. Zee stun kloar um of te marsjeren. Doo ’t sinjaal vuur de anlöp wörden geaven is zee an ’t lopen goan. Ze vun ’t al ’n betke ampart dat alle leu dee doaran metlöpen nich zo hard gungen. Achternoa kwam an ’t lecht dat zee met deu met de halve marathon. Zee is mear gewoon duurgoan en hef ’n heeln ofstand offelegt. Toch knap ai’j doar nich vuur kommen bint! Kipse of!
Maer ’t was ok onmeunig gemeudelik biej de koningsnacht of, zoas ze ’t neumt, ’t koningsfestival Eanske. ‘t Was d’r wier oalderwets plezerig, benaamd op de oalde maarkt. Mear ok op de aandere stekke in de stad was d’r wille en vermaak en doar was ok völ wierigheid. Met, dat möt d’r biej wörden zegt, völ metwearking van de Horeca. Ok kipse of!
Dan heel wat aans. Ik wil nich mear proaten oawer dat ‘Johan Derksen geval’ Doar is genog oawer zegt.
Mear ik zag wal n’n ‘loek-e-laik’’van ‘m op de tillevisie. Zundag gaf Gert-Jan Vebeek, iej wet wal den vroogere trainer, ok van FC Twente, zien bedeanken oawer Heerenveen-Cambuur. En wat har hee? De hoar zowat net as Derksen mear ok was d’r n’n grooten snor oonder ziene nös an ’n greuien. En too deanken ik biej miezölf: dat wörd gewis ’n opvolger van ‘de snor’ op de tillevisie. Met ziene eagenzinnigheid zol hee doar zekers gepast vuur wean. Ik bin beniejd of ik geliek krieg!
En nog efkes verdan oawer voetbal, hoowal ‘t d’r ok niks met te maken hef. Vergange zoaterdagoavond was d’r n’n wedstried in Almelo tusken Heracles en FC Twente.
Doar wörden miej toch n’n bölt bier oawer den keeper henne pleert, zeker ’n halve kuup vol. En ok kreeg Unnerstal aandere dingen noar ziene kop hen mietert. En Cerney wörden vuur de platte houwen duur een oet ‘t publiek.
En wat döt de scheids? Allenig mear kieken wat dr gebuurn. Ginne kipse of vuur den kearl!
Goodgoan (en verget mooderdag nich).
Tinus Kroeds (reakties: t.kroeds@gmail.com)
Column Tinus Kroeds