Takkenherrie
AlgemeenVergangene vriedagoavend in De Grolsch Veste waren d’r biej FC Twente en Sparta. zowat dertigdoezend leu dee kwamen kieken en dee gungen allemoal wier doanig te keer. Zingen, met de haan klappen en joechheinen as d’r n’n goal veel. En dat gebuurn twee moal vuur FC Twente.
Mear ok op aandere momeante heulen ze ’n moond nich too. De spöllers loat stöadig wetten dat ze dat alderbastens mooi veend en dat ze doarduur wier nieje koerazie kriegt. D’r bint bitter wenig stadions in oons laand woar as de spöllers zo völ wörd toomeudigt as in Eanske. En ai’j zeet hoo zee noa n’n wedstried een feestke bouwt met ‘n anhaank gef dat een bliksems good geveul. D’r bint spöllers dee alleanig doarum al biej FC Twente wilt spöllen.
‘dan höllt ‘t klabats op’
D’r wödt ok völ meziek dreait in ’t stadion. Wat leu veend ’t wal oardig (veural de jonge leu), aandern hebt d’r wat meer meuite met. Kottens was veur de tillevisie Leo Driessen d’r um de leu in’t hoes te berichten oawer wat d’r allemoal geburen. To hee noa de rust vanniejs begun was ’t eerste wat hee zea: “Gelukkig is ’t oflopen met dee kleare meziek”. En vriedagoavond deu ziene kollega ok zo zoer.
Too d’r wörden oftrapt vuur de tweede helfte zea Michiel Teeling: “Dee takkenherrie is oet, da’s lekker, wiej könt wier voetballen”. Is ’t warachtig zukke onplezeerige meziek dee d’r draeit wödt bij dat voetballen in De Veste? Hebt ieleu doar ok n’n mening oawer? Loat ‘t ‘ns wetten. Völlicht ku’w dat angeaven biej de klub.
Zölf heb ik ok wal ’n bedeanken oawer ’n leed dat d’r wödt zungen. Vaak genog kiek ik noar n’n wedstried oet Engelaand van Liverpool umdat dee zoo doonders mooi voetbal spölt. En dan heur en luuster iej vuurof naor dat leed ‘You never walk alone’. Ik wet nich hoo ’t oeleu dan vergeet (ai’j d’r tenmeenstens noar kiekt) mear dan wörd ik aait wal ’t betke weke, zo mooi en angriepend dat doar wörd zongen.
En helemoals, van ’n anvaank tut ’t end. En dat mis ik biej FC Twente. Doar wörd ’n stukse van dat leed ofspölt en dan hölt ’t klabats op. En dan mut de leu zölf mear oetzeuken hoo ze ’t wieders wilt zingen. En dat löp slagmoals helemoals oet de haand. D’r blif van dat mooie leed gin spoander meer oawer. En da’s zo onmeunig spietig. ’t Is toch n’n kleane meuite um ‘t (bienoa) helemoals of te spöllen? Dan zu’j zeen dat d’r völ meer bewoagenheid te weeg wörd bracht en krig ’t ok dagtgenne woarveur ’t bedoold is. Veend ieleu dat ok nich?
“Oetslag te laat vuur de papieren kraante” stun d’r in de Tubantia van vriedag. Dat heul in dat d’r op zoaterdag in de kraante niks te leazen was oawer den wedstried van vriedagaoavond teagen Sparta den um kwart vuur tien was oflopen. Da’s vanzölf dodelik vuur zonne grote regionale kraante. Zol dat allemoal bepaald wörden duur ’t Rotterdamse?
Denzölfde dag stun d’r op de eerste sportpagina wal ’n groot stuk oawer ten Hag en Ajax en oawer ’t stadion van Feyenoord. En ’n vuurvertselsel oawer FC Twente stun op sportpagina 2!
Leu an de Lonnekerspoorlaan, loat oe nich inpakken! Goodgoan.
Tinus Kroeds (reaktie: t.kroeds@gmail.com)
Column Tinus Kroeds