Wier oalderwets Poasken
AlgemeenVergangene wekkeneande was d’r wier n’n oalderwetse Poasken, vuural hier biej oons in Twente. D’r waren wier oaweral boakenvure met n’n pleer feestkes d’r umhen en in Oartmörsken gungen de poaskeerls wier te gange zoas ze dat al joarenlaank doot.
’t Vlöggeln gung wier doanig an ’t was d’r veniejs oalderwets drok in Siepelstad. En d’r wörden zowat oaweral vanzölf plat proat. Da’s mooi dat dee moodersproake wördt anhoalen. ’n Stadsomreuper in Oartmörsken röp door duur zienen toeter: “Al dee met wilt goan en poashoalt halen, mut um één uur op ’t Markt wéén”. Dat stun biej ’n vertealsel in ’n Bans zoaterdag woar as n’n kop boaven stun: “Vedaag hoalt haaln, d’r bint ok twee nieje peerde”.
Alderbastens mooi dat ok de kraante met döt an ’t in staand hoalen van oonze moodersproake. Nich allenig in de dialektmoand meert mear duur ’t gaanse joar hen. Ok reup d’r in ’n adverteansie op Radio Oost ene: “A zestig joar steet de koffie kloar”. ’n Teeken dat ok in dee heuke ’t dialekt wörd broekt.
Wat ik meender fraai veend is dat d’r in ’t Proveenciehoes wel bint dee n’n vuurslag deuden um ’t Twentse Ros van de stads- en streekbusse of te halen. Wat vuur leu dat bint is n’n vroage, mear ‘t bint gin meanske dee ok mear ietske geveul hebt vuur ‘t volksgebroek in oonze strekke. Goddank bint d’r doar ok leu dee d’r nich met inverstoan bint en d’r teegn opspeult. En dat is mear good ok. D’r mut mangs best wat aans wörden doan dan vuurhen mear zo’n gebroek as ’t Twentse Ros doar mut ze ofblieven.
Stelt oe ’ns vuur dat d’r leu zollen wean dee ’t Twentse Ros oet ’t logo van FC Twente zollen willen halen. Dan steet toch elkeen op zien achterste bene. Dat krig toch ging meanske vuur mekaar. Ofblieven also van dat Twentse Ros op dee busse.
‘’n oalderwets trapiezer’
Heel wat aans now. Vrooger gungen wiej met ’n oalderwets trapiezer duur oons mooie Twente hen um te geneeten van alns wat a’j doar teagen koompt en oonderwegges ’n kumken koffie of tee te dreenken en mangs ok wal ’n gleasken foezel. Too ik vuur joaren hen d’r meuite met kreeg um op zon trapiezer wieders te kommen heb ik miej n’n elektriese fietse anneschaft.
Kearl, dat is wat aans. Doar ku’j op oew gemak n’n heeln eand met kommen zoonder da’j echt meu wörd. ’n Trapoondersteuning het dat. Mear wiej gungen d’r nich rapper met fietsken. Wiej hoalt gewoon ’n gank an zoas wiej dat geweand waren, zo’n 15 tut 17 kilometer in’t uur.
Mear d’r bint leu dee, as ze zonne elektriese fietse eenmoal hebt, meant dat ze d’r ok onwies gezweend met mut rieden. En dat is now nicht wa’j d’r met vuur mut hebben. ’t Is n’n ondersteuning vuur ’t trappen en wieders mu’j ’t röstig an doan.
Now wilt ze de leu op de (elektriese) trapiezers n’n valhood op ’n kop loaten zetten. Völ verstaandiger zol wean om n’n snelheidsbegrenzer op de elektriese fietsen hen te doon. Dan gebuurt d’r ok gin maleur meer met dee dinge. En hooft de leu ok nich zonne valhood op n’n kop te doon.
Goodgoan allegaar.
Tinus Kroeds
(reakties: t.kroeds@gmail.com, dit was miene 30e kolumn a wier)
Column Tinus Kroeds