Gin Twents woord vuur…

12 april 2022, 16:17 Algemeen

D’r bint ’n koppel weurdebooke vuur de Twentse sproake mear in geen van dee booke ku’j veenden wat de oaverzetting is vuur ‘drone’. En dat verwoondert miej ok nich waant zo laank besteet dat woord noch nich. Umdat ik d’r oawer wil schrieven heb ik ’t noazeen mear vuurlopig loat wiej ’t biej ‘drone’. As een van oeleu ’n oardig Twents woord wet vuur ‘drone’ dan loat ’t mear heuren.

Ik kwam d’r op, too ik in de kraante leazen dat biej ’t Kunsternaarskollektief Black Brick in Eanske in n’n kealder op ’t stationsplein n’n heeln pleer van dee dingen in mekeaar bint knooit woar as ze portrette en films met könt maken. En dee kleane vleegdinge dörvt töt 120 meter de loch in. Dee leu oet Eanske hebt d’r vuureerst al 87 noar Oekraïne henne brach en vergangene wekke nog ‘s ’n moal 101.
En doar könt ze doar alns met opnemmen wat d’r op de groond gebuurt. En dat is, zoas wiej elken dag könt vernemmen, heel völ grouweliks. Loaw hoppen dat dee ‘drones’ d’r too biedreagt dat den oorlog doar rap vuurbiej is, want ‘t is toch n’n duvelskroam doar. Degenne dee doar vuur verantwoordelik is mut heel, heel völ op ziene mieter kriegen en zwoar straft wörden.

‘plietsie en de braandweer’

Trouwens, dee kleane vleegdingen goat de plietsie en de braandweer ok biej de haand hoalden. Zee könt oet zik zölf iets gewaar wörden en d’r hen vleegen en dat dan duurgeven wat d’r an de haand is. Dan könt de hölpverleeners vuurdat ze d’r bint al wetten wat ze mut doon. Woonderlike dinge toch eigenlik, mear wal onmeunig profietelik.

Duur den oorlog in Oekraïne mut d’r op eenmoal wieder wat gebüren met oonze armee. In Duutslaand broekt ze mear leefst hoonderd miljard euro um doar de armee te verstarken. In plaats dat ze oawer de hele wearld alle armees vortstreept, waant dan kunt ze ok gin oorlog maken, goat ze dat spulke nog groter maken. Teagendroads eanliks. Biej oons hebt ze ’t d’r oawer um de jonge leu wier vuur heur nummer in de armee op te roopen.
Dat dut miej d’r an deanken too ik vuur de kuuring meus. Dat was in Hengel in de Marechaussee kazerne. Dat doern n’n heeln dag. D’r waren dootieds wal zon vieftig knapen op n’n dag dee kuurt wörden. Ik was tegeliek met ’n jong dat, too hee de sökke oet deu, d’r onmeunig smerige veute vuur ’n dag kwamen. Den kuurdokter zee tegen ‘m dat hee mear vuureerst ’n tiedke met de veut in ’t water mus goan zitten. Noa ’n kleene dree keteer vreug den dokter ‘m of hee in de smiezen har woarum hee in ’t water har zetten. Dat jong zee doo: “Zeker wetten doo ik ’t nich, mear ik deank da’j miej biej de marine wilt doon!”.

En vaniejs was d’r feest biej de leu van FC Twente. Vuureerst dörven ’n anhaank wier in dat oetvak in Nijmegen noar ’n wedstried kieken noadat doar ’n peuske terugge ’n kroam in mekaar was doonderd. En dat hebt ze vol entoesiasme doan. Ok doorduur wörden d’r wier dree peunte binnenhaalt. Kompelmeant

Heanig an met Poasken met de eier.

Tinus Kroeds

(reakties: t.kroeds@gmail.com)

Column Tinus Kroeds