Goald in de tenk
AlgemeenKeerl, keerl, wat is den benziene doer. Veurige wekke stun de pries veur n’n liter gewone sprit al op € 2,49. Now is dat in vergelieking met ’n glas bier, woar as ie op ’t terras en in ’t kafé al gezweend € 3,00 vuur mut daalleggen, nich eans zo völle méér, ie hebt d’r, a’j völle gebroek maakt van ’n auto, wal ietske meer van neudig (alhoowal n’n strakken dreenker ok n’n eand keump met dee pries!).
Mear oonze regering dut d’r kommende moand € 0,17 van of. Doar scheet wiej met op heur! Tjonge, tjonge, wat rejaal.
Dan is ’t natuurlik billiger a’j elektries goat veuren. Dat schealt onmeunig völ. Maer de elektriese tuf-tufkes bint oardig an de priezige kaant en dat kan lang nich elkeen opbrengen. En gebroekte elektriese keurkes bint d’r noch nich in ’n haandel, tenmeestens nich dee n’n ordeantlike ofstaand könt halen.
‘Dat zut d’r good oet’
Avia Volt hef ’t niej bedrief dat zik geet tooleggen op poompe vuur elektries oplaaden. In ’n Bans stun dat zee op ’n Twekkeler Es (de Auke Vleerstroat in Eanske) ’n oonwies groot spektakel goat hen zetten woar as nich alleen gewoone waagens keunt opladen mear ok dee oonwies grote vrachtwaagens en mögelik ok wal autobusse. En met heel völle tegeliek.
Mear wat ok van belaank is, is dat ’t op n’n rappe wieze geet en iej geels nich lang heuft te wochten veur as ie de tenk volle hebt. Dat zut d’r good oet. Now noch veur mekaar zeen te kriegen dat alleman zonne elektriese waage kan anschaffen.
(Um oeleu ’t oonderschied met zo’n 60/65 joar terugge te loaten wetten: mien vaa kochen doomoals n’n Ford Anglia vuur 4950 geulden, dat is now 2250,00 Euro en n’n liter benzine kosten 0,48 geulden-cent, dat is now 22 Euro ceant. Ku’j noagoan hoovölle d’r biej is kommen. Mear as 10 moal zo völle).
Heel wat aans. Kortens zag ik op de tilleviesie biej ’t NOS Journaal ’n niej gezicht. Afke Boven het zee, is geboren in Dokkum en hef lange tied wont op Ameland. Ok hef zee wearkt vuur Omroep Fryslân. N’n jonge deerne dee n’n oetspraak hef dee ik heel lange tied nich meer heb heurt.
Zee pröt zo good Nederlaands dat d’r zowat niks an mankeert. In vergeliek met heure kollega’s en aandere leu in dee proatprogramma’s, is ’t oopenboarheid um heur alle letters dee d’r op heur papier of autocue stoat, te heuren oetsprekken. Ku’j oe ok nich mangs aergeren an dee leu dee dan zegt: “We hebbe de opleidinge late plaats vinde in Eindhove en de uitvoeringe in Woerde”. Afke Boven zol dee letste letter (dee N) d’r wal biej proaten en zo heurt ‘t ok.
Vroower biej ’t Polygoon Journaal was d’r Philip Boemendaal dee ’t niejs vuurleazen in absloet perfekt Nederlaands en ok Joop den Uyl kon zik doar oardig in reuren. Wel ’t ok kaant deu was de dagofsloeter op tilleviesie Dominee Buskes.
Dee leu oet de raandstad meant dat ze Nederlaands sprekt woar as niks an mankeert. Mear dee hebt mangs ’n aksent waor ai’j dreaierig van wödt..
En dan wilt ze oons in de regio wies maken dat wiej nich te verstoan bint.
An mien hoela…!
Tot tooken moal.
Tinus Kroeds
(t.kroeds@gmail .com)
Column Tinus Kroeds