Bliej met de zunne
AlgemeenIeleu zult ok wal bliej wean dat de vergangene en kommende dage de zunne wier volop an de locht steet. ’t Was ok nog wal koald mear duur dee zun wörden ‘t toch wal wat woarmer in ’t hoes en dat was te vernemmen an den gasmeter.
Den leup ’n stukske meender hard as de wekke doarvuur en dat kunt wiej merakels best gebroeken. Waant dee prieze van ’t gas dee d’r now wörd berekkent bint onwies völ meer as d’r duur ’n regel gealdt.
Den kafetaria-hoalder oet Eanske met dee twee zaken, löt in ’n Bans schrieven dat de gaspries vuur ‘m zo oonwies hoog is wörden dat hee de patat veureerst en doarnoa nog ’n moal met ’n kwartje duurder mut maken. ’t Wodt ’n luukse um ’n zäkske frites te etten temet. En hee vertellen d’r ok noch biej dat hee ziene wearknemmers gewoon duurbetaalt mear dat hee zien eigens salaris doanig noar beneden hef mötten drukken.
Loaw hoppen dat hee en al dee aandere leu dee d’r ok met te maken hebt of kriegt de tied duurkomt zoonder al te völ maleur.
Mear wiej hebt ja allemoal te maken met dee oonwies hoge gaspriezen dee d’r berekkent wödt. Dat is natuurlik vuur heel völ leu ’n merakels groot ongemak. Mear de regering hef beloavt dat zee dat goat vergooden. Alleanig geet dat nog wal ’n zetke doeren.
Kolumnist Theo Hakkert schrif in ’n Bans dat de grote baas hef zeg dat ‘de leu met de kleane knippe wat gedeuld möt hebben’. Hakkert haalt ok an dat den premier nich ’t meenste benul hef wat d’r biej de leu spölt dee in dit zo gave laand huuzt.
De leu met dee kleane knippe hebt doar gin tied vuur, dee möt dreks wörden hölpen. Degenne met n’n grooten geldbuul hebt wal zovöl gedeuld as n’n kat vuur ’t moezengat. Dee könt wal efkes wochten vuurdat ze dee vergooding kriegt. Of nich dan?
‘Dat kearlke met dat snörreke biej oonze buren’
Oonze minister president zol ok ’s ’n kuierdroad mötten griepen en ’t telefoonnommer mutten anroopen van dat keerlke in Moskou dat van dee rare dingen an ’t doon is. En nich allenig Rutte mear ok dee aandere grote bazen van dee aandere laande zollen dat mutten doon.
En ‘m an ’t verstaand brengen dat hee dreks mut oetscheiden met dee doare dingen dee hee döt doar in OekraÏne. Dat keunt ze ‘m met mekaar toch wisse wal an ’t benul brengen. Doar lust de hoonde toch gin brood van wat dat domme keerlke doar an ’t doon is.
D’r bint d’r in de vergangene tied wal meer van dee leu wes dee domme dingen hebt doan. Oet Fraankriek was d’r dat menneke dat aaltied ziene haand achter ’t vessie stoppen en biej oonze buren was doar dat kearlke met dat snörreke.
Ze bint d’r allemaol achter daal kommen en ’t is heur groezelik op ’n emmer vreuren. En dat zal d’r met dat Poetinneke ok gebuuren. Doar köj de klokke op geliek zetten.
Mear de beroerdigheid deen hee d’r al met teweage hef bracht ku’j nich meer oetpoetsen. (Ik schrief dit op zundag, oondertusken kan d’r wal n’n hoop aans wean wörden).
Hoald oe good.
Tinus Kroeds
(t.kroeds@gmail.com)
Column Tinus Kroeds