Wal oald, joonk verdan

15 februari 2022, 18:29 Algemeen

Vuureerst wil ik de leu bedaanken dee miej vergangene wekke n’n mail heb tooschikt woarin ze zegt dat ze miene vertealsels best oardig veend en ok wal wilt blieven leazen. Daankensweerd.

Oet de kraant wörden ik gewaar dat de voetbalklubs Sparta en Vosta oet Eanske met mekaar een sportkomplex goat henzetten op ’t Schreurserve. Sparta is intusken 101 joar oald en Vosta spölt al 95 joar op de Tweanske voetbalvealden.
In de joaren noa ’n oorlog heb ik dee klubs nogal voalgt. Ik heug miej noch dat d’r biej Sparta n’n spöller in het Nederlaand Zoaterdagelftal spöllen, Gerrit Kerkdijk heetten hee voalgens miej. Wieders dee Sparta aaltied op hoog nivoo met.
Biej Vosta, heug ik miej, dat door Hannes van Egmond in de goal steet. Hee hef ok metdoan in het Tweanske elftal. Later is hee ’n grooten plas oaver goan noar Australië. Ok stoat doar ’n poar steavige verdedigers, Tonie Pieper en Engelbert Hofman, ze hebt n’n rappe rechtsboeten, Job Oosten en n’n midveur dee geregeld in ‘t loek schöt, Heintje Wissink. Too hee ’n moal n’n goal maaken brak hee doarbiej ’n been. As hee op de brankard wörden votbracht vrög hee of den bal d’r wal in har zetten. Too zee ‘m toofluisteren dat dat woar was zee hee: “dan is ’t good”.
Ok Ferdinand Fransen, ’n vroogere direkteur van Arke, dee vergange joar oet de tied is kommen, heb ik doar zeen spöllen. Dat geet best good met dee beide samen en het wörd ’n froai komplex.

‘Mooi doan Jorien’

De ambachtsschool in Eanske is froai opkallefatert. Ze hebt doar heel völ wonhuuse in maakt en doar bint nogal wat leu dee doar belang is stealt. Mear, zo las ik in de kraante, d’r heuren vrooger ok n’n konsierge wonning biej. En den steet d’r noch aaltied.
Op n’n portret in de kraant stun d’r n’n ofbeelding van. Too ik dat zag dach ik: dat hoovt ze nich of te brekken, dat vaalt vanzölf wal in mekaar.
Mear wat leas ik? Den woning wörd helemoals opfrisket en d’r wörd twee wönninge van maakt. Waant zee hebt ’t vuurmekaar kregen dat het as ‘monument’ wörd annemerkt.
En dat is natuurlik onwies mooi. Dat zuk oald spul (het is oet 1922) wörd anhoalen.

Woarschienlik kiekt ieleu disse wekke ok vaak genog noar dee oetzeandingen op de telvisie van de Olympische Spöllen. Vergangene wekke bint doar umständig te zeen de wedstrieden van de shorttrack. Iej wet wal, dat heel rap schaatsen op zonne kleane baan met ‘n stuk of wat leu tegeliek.
Op de telvisie biej de NPO was doar te zeen oonze eigenste Jorien ter Mors, dee zölf nich meer wat döt op de iesbaan (wat hef ze völ mooie dinger loaten zeen biej ‘t shorttrack en op de lange baan ofstanden) mear analieses gef biej dat shorttrack. En wat döt ze dat oonwies gaaf.
Met völ kunnigheid en vakmanschop gef zee heur bedeanken en kuiert ze, mangs met ‘n betke humor, op n’n gestöadige wieze wat zee d’r van deankt. Ik veend heur oonwies gepast op dee plekke. Mooi doan Jorien. Wier ene oet Eanske dee löt zeen dat hier ok heel völ taleante te veenden bint.

Goodgoan.

Tinus Kroeds.

(t.kroeds@gmail.com)

Column Tinus Kroeds