Hoo geet ’t met oe?
AlgemeenBiej ’t MST, ’t zeekenhoes in Eanske, geft ze oe ginnen haand meer ai’j binnenkoomt of votgoat. Zee hadden dat al langer in de mutse mear noe, met den koronakroam d’r biej, heb ze ’n besloet nommen um ok vuur ’n tookomst dat nich meer te doon.
Van de ene kaant is doar wal verständnis vuur op te brengen mear ’t wörd natuurlik wal ’n stuk onpersoonliker en ofstaandeliker. Mögelik dat ze ai’j d’r in koomt een persoonlik proatke begint woarduur iej ’n betke op oew gemak veult. Mear ene de haand toostekken gef aaltied nog wat geröstigheid en vreandschöppelikheid.
‘Hee wil proaten met de leu’
Oonzen nieje Börgermeister in Eanske, Roelof Bleeker, hef vergangene wekke zienen ambstketten umdoon (steet ‘m wa good). Hee zee dat hee heel völ nog wet van Eanske oet zienen tied as wethoalder doar mear dat d’r ok wier zovöl niejs is kommen dat hee zik doar meer op wil tooleggen.
Hee wil op pad de buurten in en proaten met de leu oet Eanske. Lik miej dat zowat gin kwoad kan. Keump hee n’n bölt te wetten as de leu d’r tenmeestens liek oet met vuur ’n droad koompt. Gef ‘m de möggelikheid um zik good in te boeren.
Vergange wekke mus ik noar wel in de Raiffeissenstraat in Eanske. Ik was met ’n auto. Vanoet de Möllenstroat bin ik veurt langs ’t stadskantoor in de richting van de Raiffeissentroat doar biej ’t belastingkantoor. Mear wat deank iej? Doar ku’j helemoals nicht oetrieden. Dat is allenig vuur leu met ’n trapiezer. ’t Zal best eargens oonderwegges hebben stoan op ’n brod mear doar heb ik nich op let.
Ik meus doarum umdraaien en wier terugge richting stadskantoor. Too deank ik, iej gaot de Deurningerstraot in en dan ku’j biej de vroogere Rabobank leenksof de Raiffeissenstroat in. Joa, an mien hoelaa! Doar ku’j geels nich linksof, iej mut dan duurrieden en koomp dan biej de stoplechte biej’t kruuspeunt van de singel met de Deurningerstroat. Doar bin ik mear links of goan en kort doarop ’n Kottendiek in vuurt.
Too ik doar wier oetkwam was ik wier op de Deurningerstroat en kon ik vandoaroet wal de Raiffeissenstraot in. Dat is ok de enigste möggelikheid, a’j tenmeenstens met ’n auto bint, um in de Raiffeissentroat te kommen. Oonwies umslachtig veend ik. En ik deank dat d’r meer leu zo oawer deankt. Wat an doon Gemeente Eanske!
Dit vertealsel is a wier de twintigste moal dat ’t op dizze plekke in de Hoes-an-Hoes kraante steet. Oawer de vuurgoande stukke heb ik nooit niks van gin ene heurt of ’t ok leazen wörd. Dat is meestentieds wal oardig vuur n’n schriever um te wetten of d’r andacht vuur ziene geschichten is. En of de leu, dee ’t least d’r ok ’n luk plezeer an beleafd. Loat ’mear ’s wetten of ik d’r met duur mot goan! Nog wal efkes noar oonze FC oet De Veste. Zee spöllen vergangene zoaterdag teagen Vitesse, de club woarmet ze in konkurrensie bint vuur een van de hogere plekken op de rangliest. ‘t Gung eanliks geels nich meuilik. Niejsgierig wat ze zundag doot in de Arena teagen 020. Dat zal nich zo glad van de haand goan, mear iej wet mear nooit!
Good goan, Tinus Kroeds
(t.kroeds@gmail.com)
Column Tinus Kroeds