Löchvretmöalken
A’j wal ’s moal met de vleegmasien op vakaansie bint wes of veur wat aans met zo’n vleegding duur de loch bint goan dan he’j wis en zekers wal ’s n’n borrel of ‘n gleasken wien droonken oonderwegters.
En as ’t ’n lang töchtken was dan ko’j d’r ok ’n luk etten biej kriegen. Mangs gun zonne vleegmasien deur n’n loag weend hen. Dat neumt ze turbelensie.
En dan kan ’t good tekeer goan doar boaven op zo’n tien kilometer heugte. A’j dan ’n luk etten veur oe hebt dan is de kaans groot da’j ‘n kroam oawer de boks hen kriegt.
'Duur de loch hen met ’n reuzenrad woar as ie ok etten en dreenken kunt kriegen'
Seend kort ku’j in Eanske ok duur de loch hen met ’n reuzenrad woar as ie ok etten en dreenken kunt kriegen. Dat ding steet in ’t Volkspark.
In zonne kabine kö’j met ’n man of veer, vieve goan zitten an ’n toafelke en dan doot ze oe vuur oonderwegters n’n borrel of ’n pulken bier met.
Dan goa’j de loch in en a’j wier oonderan bint dan steet d’r wel klaor dee gef oe n’n tealder met wat etten en dan goa’j vaniejs noar boaven om dat spul noar binnen te warken.
En ’t hoalt nich op. Want an de groond krieg ie ok noch ’n moal ’n noagerecht wat ie wier deur ’n haals kunt doon a’j noch ’n moal roondreait. Iej hoalt vanzölf vaak genog an waant d’r bint nog völ meer leu dee datzölfde doot as oe en dee kriegt an de groond ok slagmoals wier wat niejs opdeent.
A’j deankt dat ’t plezerig is mu’j ’t absloet ’n moal doon. Turbulensie kom ie oonderwegters nig teagen mear hoal d’r wal rekkenschop met dat ’t doar boaven ok wal ’s mangs hen en wier geet en dan mu’j oetkieken dat oe ’t spul nich van ’n tealder ofvaalt.
En da’j biej de vermecelli soep de slierten nich oawer ’t buis hen kriegt! En iej mut d’r vanzölf ok wal vuur betalen!
D’r is proat van, geruchten neumt ze zowat, dat d’r ok biej aandere kearmis spullen etten en dreenken serveert wörd. Zoas biej de dreaimölle.
Doar ku’j n’n zak patat kriegen met dubbel zoere mayonnaise en in de botsauto’s beed ze oe ’n patatje oorlog an. Biejzoonder is ok dat ze in de achtbane n’n zigeunder snietsel anpresenteert.
Biej dee takelkräne ku’j met ’n betke good geluk n’n kroket tevuurschien teuvern. En oaweral wörd d’r vanzölf ’n glas foezel of ’n pulken bier anpresenteert.
Wat d’r krek biej de woarzegster op ’t etbreefken steet dat is koffiedik kieken. Dat is te leazen in den glaazen bol.
Loat ’t mear op oe ofkommen.
As d’r wat te mealden is oawer dizze aard dingen dan leas ie ’t wis en zekers in disse kraante.
Goodgoan.
Tinus Kroeds
(Tinus Kroeds is een pseudoniem. Naam, adres en telefoonnummer van de schrijver is bekend bij de redactie)