Börgermeister
AlgemeenOnno van Veldhuizen geet vot. ’t Is ‘m oawer. Hee hef 6 joar laank zeggenschop had in Eanske en hef ’n kroam good biej mekaar hoalden. Tenmeesten dat köj toch wal bepoalen. D’r bint d’r ôk wel, dee doar aans oawer deenkt, mear dat bint d’r nich zo völle. Wat hee geet doon as hee temet de duur achter zik hef dichttrökken? Hee wödt Staadsroad biej de bestuursrechtsproak van ’n Road van State. Köj ’t nog mooier kriegen? Ik wunske ‘m n’n goode tied too noa Eanske. Goodgoan Onno.
D’r mot vanzölf wal n’n nieje Börgermeister kommen. Doar wöd al ’n peuske oawer steggelt. In de kraant köj leazen dat d’r zik 17 kandidoate hebt opgeaven. En doar was ene dame biej. Teun Staal, n’n schriever van Tubantia, veend dat nich biester völle. Doarum hef hee n’n lieste maakt met vrouwleu dee zik eanliks allemoal mut opgeaven um Börgermeister van Eanske te wörden. Hoovöl d’r op dee lieste staot van Teun? Twee-en-tachntig!! Joawal: 82!! Deank oew ’s in, zee zult zik allemaol opgeaven. Dan mag d’r wal n’n kommissie wörden annestelt van ’n stuk of dartig, veertig manleu/vrouwleu dee goat oetzeuken wel d’r ’t meest gepast is um ’n kraom in Eanske biej mekaar te hoalden. En doar heb ze gewis n’n onmeunige lange tied veur nödig. D’r is n’n tiedelike Börgermeister beneumd dee de boel ’n tiedke strak möt hoalden. Dat is Theo Bovens oet Limburg, nich van boaven mear alzoo vanoonder. Hee hef in alle geval n’n dialekt sproake en doar hoalt wiej wa van, nich woar?
Ai’j oe wilt anmealden um in dee anwies kommissie te goan zitten köj dat doon. En as d’r zik te völ anmeald mut ök doar veureerst de goode kandidoaten wörden oetvisket. Ik deank da’w dan um en noabiej twee joar wieder bint. Hebt d’r wier n’n bult leu n’n langen tied wat te doon.
Wiej loat al dee 82 vrouwleu biej mekaar kommen in n’n gloepens grooten Sporthal en dan kan ’t ankieken en kuren angoan. Ik deank dat ik miej disse wekke nog goa opgeaven vuur een of beide kommissies. Lik miej wal onmeunig gaaf um te doon. Dooi’j ôk met?
Tinus Kroeds
Column Tinus Kroeds