Niej! Hoo dat zo??

Wiej hebt in Eanske n’n niejen Börgemeister. Roelof Bleker. Helemoals niej is hee nich. Al ’n poar joar terugge hef hee ok völ weark doan in de gemeenteroad as wethoalder. Mear as Börgemeister is hee gloodniej en ’t lik miej too dat hee ‘t spul good geet anpakken. Hee keant de stad en de kontreie en dat schort n’n slok op ’n gleaske foezel.

Biej FC Twente kriegt ze n’n niejen direkteur. Den wel d’r zat was a rap wier vot en intusken mut Paul van der Kraan ’n kroam op de riege hoalden vuur ’n haalf joar en dan keump d’r echt n’n niejen direkteur in De Veste. Ok niej alzoo.

En wiej krieg ’t niej kabinet.’n Nieje regering? Hoo zo dat, niej? D’r is ginnen sputter niejs an. ’t Bint dezölfde leu dee d’r al völeer hebt daal zetten. Krek dee veer partiejen dee de vergangene veer joar ok al van alns hebt oetvigeliert en woar ’t mangs onmeunig misgöng.
Ze bint met mekaar ok al votgoan umdat ze de boel verslatert hadden. En now koomp ze alle veer wier terugge. Dat vrouwmeanske van D66 gung zölfs helemoal vot, wol nich meer op dezölfde straot paradeeren as Mark Rutte mear steet now wier met ‘n nös vuuran.

‘’t hele oale spul keump wier terugge’

En de baas van ’t spul hef onmeunig stoan te leegen en kreeg n’n motie van achterdocht an de bokse (ene van ofkeurn gung ‘m mear kats langs ’t lief hen). Mear ok hee steet wier völop met zienen nös vuuran. D’r is d’r ok een biej, van de CU, dee dudelik zee dat hee vuur ginne stuver meer in n’n regering wol zitten woar as Mark Rutte ok biej in zat. Nooit nich! En now geet hee ok wier biej dee leu op de slippe zitten. Nog ene dee wier met wil doon, den van de CDA. Dee oonze Pieter zo mirakels hef behaandeld en n’n kampanje op töw wol zetten um Mark n’n beroerde name an te smearen. Ok hee wil d’r wier biej te passe kommen. Gin niej kabinet zodoanig, mear ’t hele oale spul keump wier terugge.

Zoas d’r wödt zegt koomp d’r twintig ministers en tien staot-sekretarissen. Dat bint d’r zes meer as d’r wes bint. Kost ’n poar ceante. Mear doar is wal geald vuur noar ’t schient. Mear um oonze zoarg-metwearkers en de schoolmeisters wat meer too te stoppen, doarvuur is de knippe leuge.

En Mark Rutte mut dee ministers en stoat-sekretarissen oetzeuken. Biej um mut zee kuieren of ze d’r wal zin in hebt en d’r gepast vuur bint. D’r wödt heur dan wal ’n paor vroagen ofnömmen. As vuurbeeld: “Sprek iej wal ‘ns onwoarheden? Waant dat dörv nich. Of eanliks wal waant dat doo ik ok wal mangs”. Of: “Bin iej wal ‘ns eargens votlopen of votstuurt? Dan bu’j nich gepast. Of toch wal eanliks. Ik heb dat ok wal ’ns doan”. En dan: “Wat ok wal haandig is a’j oe mangs dinge nich mear in gedachten terugge keunt brengen. Doar kö’j biester kaant met wegkommen. Onthoal dat good”.

Wat zit ik eanliks allemoal te bazelen. ‘t Löp zoas ’t löp. Doar keunt wiej helegaars niks aans van maken. Wiej hebt oons d’r mear noar te riegen. Bin wal beniejd hoo dat allemaol in ’n tookomst oetpakt.

Geröste en gemeudelike Mirreweenterdage.

Tinus Kroeds.

Column Tinus Kroeds