Daankensweerd
Algemeen’t Gebuurt nog wal ‘ns. Dat d’r ’n koppel leu met mekaar eargens de schoolder oonderzet en dat ze dan, met n’n vuurankeerl vuurop, wat anpakt. Met verloop van tied kriegt ze ’t dan vuurmekaar wat ze geern wilt.
Meestentieds is dat dan vuur n’n goode angeleagenheid. Dan keump d’r ’n stukske van in de kraant woarin steet wat d’r zoal gebuurd is en dan krig den vuurankeerl ’n leentke of (in disse tied) n’n mirreweenterhoorn en de heulde dat hee ’t vuur mekaar hef kregen. Völtieds löt hee dat dan zo.
Mear d’r bint ok vuurankeerls dee dan in eur daankweurde anhaalt dat hee ’t nich allenig hef doan en dat de heulde nich bloos vuur um is mear vuur ’t gaanse koppel dat d’r an met hef wearkt.
Doalik kom ik hierop nog terugge.
‘N’n vuurankeerl den hier oet Twente keump’
Wiej hebt in oons laand ’n poar voetbalklub dee ’t verdomd good doot in Europa. Mear ene doarvan, Ajax, spölt in de Championsleague en doar doot zee ’t onmeunig good. Ze goat al meer wieder en wieder. En dat met n’n vuurankeerl den hier oet Twente keump.
N’n tied terugge too kön hee biej dee leu van VI geels niks good doon en was ‘t ’n boerke oet de proveencie. En ok den azienfles van De Telegraaf probeern ‘m de groond in te douwen.
Mear de leste tied heur iej dee leu doar nich meer oawer. Oonze kontreie vennoot hef de zake umkeert.
Mear wat miej dwars zit: De leu van Ajax hebt intusken al 70,7 miljoen euro’s biej mekaar spölt en dat is n’n heeln bölt geald. Wat dee aandere Europagangers biej mekaar hebt graait bint doarbiej aapnötkes. En as dee van de Arena nog wieders koomp beurt ze nog völle meer. Dat is oonwies mooi veur dee leu mear zee mut d’r eanliks wal rekkning met hoaldn dat ze ’t nich allenig vuur mekaar hebt kregen um kampioen te wörden.
Doar hebt ze zeuventeen aandere klubs vuur nödig had um zowiet te kommen. As ze doar nich teagen könt spöllen wördt ze absloet gin meister. ’n Betke meer van dee völle miljoenen verdeeln oonder dee aandere klubs zol nich meer as billik wean. Waant van dee klubs bint d’r n’n bölt dee ’t, wat ’t geald anbelangt, nich keunt trekken en d’r könt d’r wal ‘ns köppelke van umkiepeln as ze d’r nich wat moos biej kriegt.
Stelt oe ’ns vuur, dee aandere klubs zegt dat ze nich meer koomp spöllen in de Arena vuur de kompetitie. Zee kriegt dan n’n kleene boete en dree peunte meender. Dat könt ze best lieden want Ajax wördt toch slagmoals kampioen. Mear ik deank dat Ajax dat nich lollig veend.
En doarbiej kom ik dan terugge op ’t eerste stukske dat ik in disse kolumn schreef. Dat den vuurankeerl zeg dat hee ’t nich alleanig hef doan mear dat ‘t hele koppel net zovöl eer verdeend as um. En dat zollen ze eanliks biej Ajax ok mutten doon: Dankeenweerd aandere klub dat wiej teagen oeleu mögen spöllen. Wiej bint blieje met oe allemoal en wiej doot oeleu almoal n’n luk met oet den grooten gealdbuul.
Ik weunske oeleu, vuurzowiet dat kan met al dee moatregelen, n’n gooden Sinterkloas.
Tinus Kroeds.
Column Tinus Kroeds
