Geröste kerstdagen?

Dan zit ie op n’n zundagmorgen achter oene pc um veur disse kraante iets te schrieven wat vuur de leazers ok noch ’n betke de meuite weerd is. Biej oene oaverbuuren hebt ze kortens n’n toorn maakt met allerhaande kluren lempkes dee an en oet goat. Ok oaverdag bint ze te zeen mear as ’t duuster wördt dan bint ze op zien moois. Vanof miene warkstea kan ik d’r van geneeten. An de aandere kaant van de stroat hebt ze zowat oawer de helfte van de riege wonhuuze an ’n geavel de hele riege witte lempkes annebracht. En vuur de veanster biej onmeunig völle huuze stoat van allerhaande mooie dingen dee d’r duur ’n riegel nich staot.
Zoas kerstmennekes en steerne met of zoonder lempkes. Woarum is dat allemoal? Umdat ’t Kerstmis wördt. ’t Is noch lange nich zo wied, wie kriegt doarvuur noch vuureerst Sinterkloas, mear wiej keunt d’r vust gewoon an wörden. Kerstmis, de tied van vrea en noaberschop.

‘D’r wördt zölfs schötten’

Hoo, wocht ’s efkes, tied van vrea en noaberschop? Dat is d’r op dit momeant geels nich. D’r wördt tekeer goan duur ’t hele laand in verscheidene stea (en ok in Eanske, waor ze zundagoavond tekeer wollen goan, mear duur ’n noodverorderinge hebt ze ‘t ’n betke kunnen teumigen).
En nich zo zuunig ok. D’r wördt onmeunig völ an bölle houwen. D’r wördt zölfs schötten en d’r wördt leu noar ’t zeekenhoes henne bracht umdat ze gewoond bint raakt. En woarum? Umdat dee leu d’r nich met inverstoat dat oonze regering moatregelen hef nömmen um den onpleazerige Corona ’n kop in te können drukken. Dat d’r leu bint dee ’t nich oardig veend dat wiej nich oaveral meer henne keunt kan ik begriepen. Meen ie dat wiejleu doar konteant met bint? ’t Zol natuurlik mooi wean dat wiej met mekaar wier könt goan en staon woar as wiej wilt, mear as d’r zon laankwielig virus roondtrekt dan heb wiej oons doar vuur an te passen.
En dan gef ’t gin pas um dan mear ’n heeln zooi in mekaar te houwen, in de braand te stekken of arger noch, mekaar ’t zeekenhoes in de warken. ’t Zol al n’n bölt better wörden as d’r meer leu waren dee zik loat prikken woarduur ze neet biester völle of geels nich heender hebt van dee Corona. Iej mut wal n’n gooden groond hebben um dat nich te doon.
Mear met al dat gedoonder scheet dee leu (en wiej ok) ginne meter op. ’t Wördt d’r absloet nich aans van. Starker noch, ’t geet allemoal nog völ langer doeren. Ik kan miej doar hellig oawer maken, gloepens hellig zölfs. Waant ’t verdut n’n onmeunige bölt geald woar as völ bettere dinge met te doon bint. De grote baas van de regering, den van justistie, zeg telkenmoale wier, dat zowat nooit neet meer mag gebuuren, dat ‘t krimineel gedrag is en dat d’r zwoar wördt straft. Mear doar heb wiej al joaren niks van vernömmen. ’t Wördt tied dat ze doar ’s met duurtast.

Kerstmis, de tied van de vrea en van noabeschop. Doar hebt dee lastpötte geels niks van loaten vernemmen. Wiej hebt doar boaven, biej de wadden geleuf ik, noch n’n hele riege nich bewonnde eilaande. Könt wiej ze doar nich met mekaar hen doon? Hebt de aandere leu geröste Kerstdagen.

Tinus Kroeds.

Column Tinus Kroeds