Muziekkorps op stroat

Kortens zag ik ’n klean stukske in de kraante woarin stun dat de Koninklijke Enschedese Burgerharmonie ’n konsert gef op zundag 14 november um dree uur noamiddag in Prismare in Eanske.
Dat zal best de meuite weard wean om hen te goan a’j n’n leefhebber bint. Mear as ik dat leas geet miene gedachtenis n’n eand terugge. Dan zee ik veur miej dee harmonie orkeste dee slagmoals duur de stroate hen kuiert.
In Eanske bint dat oondermeer ‘t ‘Muziekcorps der Voormalige Schutterij’ met doar geliek achterhen de ‘Koninklijke Leo Harmonie’. Dee twee hebt hutje en mutje biej mekaar smetten en het now ‘Stadsharmonie Enschede’. En ok al wat ik eer heb neumt de ‘Koninklijke Enschedese Burgerharmonie’ En nich te vergetten de ‘Christelijke Muziekvereniging Soli Deo Gloria’ (d’r bint d’r nog wal ’n poar meer in groot Eanske).
Dee orkeste zee’j dootieds slagmoals duur de stroate kuiern as d’r wier ’s eargns wat te doon is. Of as d’r ene van dee blaozers of trommelaars ’n jubileum hef. Dan brengt ze ‘m n’n serenade en n’n bos bloomen. Geliek as iej heurt dat d’r ’n muziekkorps in de buurte is dan doo’j ’n jas an en goa’j hen kieken en luustern. Ok met Hemmelvoart of aandere feestdage goat ze allemoal op stap, n’n heeln eand vot woar as ’n kafee in de buurt is.
Waant ’n gleaske foezel heurt d’r ja biej. En dan loopt d’r heel völ leu achterhen waant ’t is ’n feeske as d’r zowat gebuurt. In disse tied zee’j dat gladdendaals nich meer. As ze now op stroat zollen kuiern dan bleef d’r nich völ van oawer met al dat gevoar van autoos en busse. Biej ’n karnavalsumgang wilt ze nog wal ’ns metloopen.

In ’n anvaank bint ’t allenig muziekanten dee biej de harmonie met kuiert. Mear later hen komt d’r ok n’n drumband biej met dee groote trommel. En doarvuur n’n tambour-maitre met zunne stok met n’n bol d’r an. Heel mangs gooit hee dan ding de loch in in de hoppe dat hee ’m wier terug kan griepen.
Ik mean dat ’n eerste tambour maitre biej de Leo Harmonie koomp (enen Witzel meen ik dat hee hetten). En wier ’t stuk wiederop loopt d’r veurhen wichter met van dee korte rökskes en van dee kleane stökskes, Majorettes het dee. Dat is in ’n anvaank n’n bezeensweerdigheid. Gleuiendig jammer dat disse gebroeken nich mear keunt wörden oetvoert.
Later hen koomp d’r ok völ drumbands op de stroate mear ok dee keunt nich meer oet de veut in de drokte. ‘t Heugt miej nog wal dat d’r in de wiet vergangene jaoren ’n internationaal drumband konkoers wördt hoalen in ’t van Heekpark. Doar komt oet de hele wearld korpsen hen dee zik onmeunig anstrengt um ’n mooi stukske muziek te loaten heuren. En tusken ’t konkoers deur loopt ze ok wal mangs duur de stad hen.
Spietig genog is dat allemoal historie wörden. Wat dr nog wal gebuurt is konserte in n’n halle of n’n zaal. Zoas also kommende zundag in Prismare duur de Koninklijke Enschedse Burgerharmonie.
Doar mu’w ’t dan mear met doon. Ok wal schier natuurlik.

Tinus Kroeds

MB: Vergangene wekke schreef ik dat n’n ies- en hardloopbaan achthoonderd meter laank bint. Dat is natuurlik veerhoonderd meter. Nemt miej nich kwoalik.

Column Tinus Kroeds