Dat zol weareld niejs wean

Hoo lang bint ze now al nich an ’t steggeln oawer wat d’r mut gebuurn met ’t vleegveald. D’r is al völ aanders wörden doar tusken Lönneker, Olnzel en Hengel. D’r wördt doar vaak genog wat op touw zet. In dee onwies grote loodsen waor as de vleegmasiens in parkeert wörden, is slagmoals wat te doon en ok doarboeten bint d’r al oonwies völ beleavenissen op töw zet. Deank mear an dat toneelspel van oondermeer Hanna van Hendrik met Johanna ter Steege en Huub Stapel.
En d’r is ok ’n oonwies gaaf fiets- en kuierpad anlegt en oonderwegges ku’j zölfs wat te dreenken en te etten gebroeken. D’r is ok n’n oetkiektoorn henzet woar as ie van boaven oawer de umgeaving kunt henzeen. En dan ligt d’r ok nog dee startbaan van dree kilometer laank woar as de zweav-vleegmasiens en dee kleane eenvoaldige vleegmasiens de loch in könt en ok wier noar oonder hen könt kommen.

‘Wat denkt ieleu d’r van’

En oawer dee startbaan wil ik ‘ns met oeleu proaten. Dee dree kilometer is natuurlik veur oonwies völ dingen te gebroeken.
En a’j de weareld grote kiekerds wilt loaten opzetten dan weet ik nog wal wat um te doon met dee startbaan. Iej weet allemoal wal dat ze biej ‘t schaatsenloopen en biej hardloopen n’n baan hebt van achthoonderd meter woar as ze slagmoals duur n’n boch hen möt um oawer te kommen.
Noe, wat deankt ieleu d’r van um op dee dree kilometer startbaan van ‘t vleegveald van ’n anvaank töt ‘t eand n’n onwies grooten halle hen te zetten met n’n dree kilometer lange iesbaan dee ok kan wörden umzet noar n’n hardloopbaan. An de zietkaant allemoal zit- en stoanplekke met doarachterhen grote en kleane weenkels en ethuuse woar as de leu zik, neungst ’t kieken noar de wedstrieden, könt vermaken.
En d’r bint nog wal völle dingen te bedeanken um doar hen te knooien. Mear ’t belangriekste is natuurlik dat d’r n’n schaatsbaan en n’n hardloopbaan is van dree kilometer. Biej ’t schaatsenloopen könt ze dan de dree kilometer in eenmoal ofjagen en de kortere stukke (viefhoonderd, doezend en viefteenhonderd meter) ok in eenmoal ofwarken. Biej de tiendoezend meter mut ze dan an ’t eand efkes n’n dreaing maken dee niks te beteekenen hef.
En biej ’t hardloopen (as ze ’t ies hebt vorthaalt en doar n’n seentelbaan hebt henlegt) geet ’t krek zo as biej ’t schaatsenloopen. Wat meen iej wat veur tieden doar wot henzet. Onwies gaaf zol dan wean. En wat veur weareld niejs zol dat wal nich beduuden? Eanske, Tweante en Nederlaand zol weareld niejs wean.
En wat ’n drokte zol dat geaven. Onwies völ vollek, nich alleanig op ’t vleegveld, maer ok in de stad. En de hotels bint allemaol ‘ausgebucht’. D’r mot d’r zölfs wat biej kommen. Ik deank dat d’r toch ‘ns wa leu de köppe biej mekaar mut stekken um oawer disse möggelikheden noa te deanken en te proaten.
Dan komt d’r gewis ok noch wal meer ideeën op toafel. Wat ’t allemoal geet kösten? Dat könt de deskeundigen wal te nauw en te noa berekkenen. En ’t gesteggel ‘wat dr now met ’t vleegveald mut gebuuren’ is oet de weareld. Goodgoan.

Tinus Kroeds

Column Tinus Kroeds