Lekkere billen

“Iej woagt oe op glad ies met zonne kop boaven oew wekkeliks vertealsel” wödt miej zegt.

“Dizzen of ’n aanderen dag he’j leu biej oe an de duur stoan van de Mie Toe beweaging dee oe vuur de veut smiet da’j te wiet goat en oew benemmen gin pas gef (op zien Hollaands: ongewenst gedrag)”. Loat ik oew d’r dan mear dreks biej vertellen dat ‘t ‘lekkere billen’ nich slöt op meansleu mear op kikvörse.
In de kraante heb ik leazen dat d’r n’n milieu-organisasie is, Robin des Bois, dee hef oetdoktert dat de kikvörse in 2032 op bint. En dat keump umdat wiej te völ ‘kikkerbillekes’ et.
En road ’s wat: oons laand steet wat dat anbelangt op de derde plek noa Fraankriek en België. Wiej et te völ van dee lekkere billekes van de kikvörse.
Ik heb ze nog nooit nich oppegetten en ik zee ok nich biester vaak dat ze eargens op n’n menukaart stoat mear wiej stoat wal in de top wat het opetten angeet. Nich meer doon dus. En oaweral woar kikvörse in de buurt bint wordt d’r onmeunig völ insecten opvretten duur dee deers en gebroekt de boeren meender bestriedingsmiddelen. Meender oetstoot dus.
En doar zit wiej noe net op te wochten. Hoo meer kikvörse, hoo beter ’t is! D’r wödt noe in oons laand 2,6 miljoon kilo gebroekt in de horeca en de supermaarkte. Wiej mut ze nich meer opetten, tenmeenstens dee billekes nich, mear an ‘t water loaten zitten.

‘Ze kunt goan en stoan woar as ze wilt’ 

 Vergangene wekke schreef ik oawer de krapte an deenstvolk in ’n bouw. Mear iej hebt woarschienlijk wal leazen dat d’r biej justitie in Gelderland viefteenhonderd strafangeleagenheden an de kaant wördt legt. De leu dee wat hebt gapt of n’n aander n’n oplawaaier an de kop hebt geaven of wat dan ok wat nich duur ’n böggel kan, hebt oetvretten, dee hooft nich te brommen of kriegt gin warkuren toebedeelt. Helemoal niks. 

Ze kunt goan en stoan woar as ze wilt. En woarum? Umdat d’r nich genog rechters bint um ‘t te behaandeln. ’t Mot nich mesjokkerer wörden!
Vurige wekke heb ik noch anhaalt dat ik drie-en-vieftig euro oet de knippe mös halen umdat ik zes kilometer te hard har veurt. En dee leu könt heur gang goan doar in Gelderlaand.
En ’t zut d’r nich noar oet dat d’r eerdaagns meer rechters bint um de zaken of te haandelen. Goat oew gang leu ai’j d’r verlet an hebt. Iej kriegt toch ginnen straf. Bespöttelik toch?

Dizzen kolumn is ’n veertigsten al wier de ik oeleu op ’n haals schoef. Veertig wekke achterhenne. ’t Gung oawer van alns. Zo now en dan kreeg ik n’n oardige en plezerige reaktie mear hoovöl leu dat spassiewatsie van miej elke wekke of mangs least doar heb ik nich ’t minste öann van.
Ik goa d’r mear van oet dat ’t biej wat leu wal past aans har ik van de residentie in Bookel wat heurt dat ’t nich meer nödig is.

Ik goa d’r efkes tusken oet um n’n vakaansie te hoalden. Mögelik dat ik doarnoa ’n droad wier oppak. Loat ’t mear wetten.

N’n mooien zommer wieders. 

Tinus Kroeds

(reakties: t.kroeds@gmail.com)

Column Tinus Kroeds