Beteun in ‘n bouw, n’n bult in de knippe, wied vot van hoes

Steven Dorrestijn oet Eanske, n’n stoadigen leazer van disse kolumn, hef miej bod doan van n’n foto dee hee hef schotten op de bouwplaats in de Raiffeisenstraot (Jumbo) en woarop Annemmer Meijerink en Bouwend Nederlaand ofdeling regio Oost in ’t dialekt n’n oproop doot an jonge leu um zik an te mealden vuur n’n baan in de bouw.
Ze hebt doar krapte an vakleu en in dat ambacht is d’r n’n gooden boterham, met good wat d’r op, te verdeenen. Ik gef dee oproop geerne duur. Zekers ok umdat ’t heelmoals in ’t plat is hennezet. Plat in de stad alzoo!

’t Centraal Justitioneel Incassobureau zit ok in n’n stad: Leeuwarden. Doar hebt ze vuureerst nog leu genog. Ik kreeg kortns n’n breef in de busse waarin was hennezet dat ik in Almelo 6 kilometer te hard har veurt en dat ik doarvuur de knip meus trekken: dree-en-vieftig euro!!

Net as dee leu in Den Haag, dee, as ze ’n luk nich good hebt doan, excuses anbeedt en doar dan met kloar bint, heb ik dat ok doan. Mear biej miej ketsen dat of. En as ik te laat zol betalen keump d’r nog n’n heeln pleer biej. Is dat gin diskriminoasie?

N’n voetballer, Paul Pogba het hee, kreeg ’n bod van Manchester United um doar te blieven spöllen. Dan kreeg hee, schrik nich, dree-hoonderd-vieftig doezend euro in de wekke. Dat is achtteen miljoon vuur ’n heel joar. Mear Paulke veend dat nich genog, hee meant dat doar gin achting oet blik. Woarlik nich te geleuven. Den mut ze ’s tusken dee leu zetten dee stödig noar de voedselbaank hen mut en dee meer as ’n miljoon leu in oons laand dee eerdaags in ’t maleur koomp met heure ceanten. En zoas Pogba bint d’r nog völ meer dee zovöl opstriekt. Dee voetballers könt d’r niks vuur, mear de leu dee dat beköstigt bint knettergek.

Steven van der Heijden, grote baas van Corendon, zea op tv oawer dee alteroasie op Schiphol dat de leu oet ’t westen heure vakaansie nich wilt doon vanof ’n vleegveld in België of in Duutslaand. Te wied vot. Nee. De leu oet ’t Noorden, Oosten en Zuuden dörvt van hem wal helemoal noar Schiphol. Wat n’n arrogaansie!

Doot heanig an tooken wekke.

Tinus Kroeds

(reakties: t.kroeds@gmail.com)

Column Tinus Kroeds