Was ’t vrogertieds better?

Absloet nich! ’t Was aans, völ aans. In ’n Bans van vergangene zoaterdag leas ik ’n vertealsel van Joost Dijkgraaf. Hee hef oetdoktert hoo ’t geet met dee ‘flisbrengers’, iej wet wal, dee jonge leu dee oe in meender dan tien minuten de bosschoppen an ‘t hoes koomp brengen. Met n’n snel trapiezer of n’n brommer jaagt ze duur de stad hen. Joost hef bepoald dat hee ’t zölf ’n luk rapper kan en dat hee dan ok nog billikker oet is.
Mear ’t geet d’r um, dat zölf bosschoppen halen zowat oet de mode is kommen. Dat is natuurlik nich zo. D’r goat nog zat leu noar de supermaarkt of aandere weenkels um wat aan te schaffen. En ok oawer internet wördt d’r onmeunig völ in hoes haalt. En ai’j ’t dan oawer vrogertieds hebt dan gung dat völle aans.
De grutter kwam an’t hoes met ’n beukske woarin hee daalschreef welke bosschoppen iej neudig hadden en dan bezoargen hee ze s’aanderdaags biej oe an ’t hoes en dörven iej geliek de knip trekken. De melkboer kwam biej oe veurbiej um zuvelprodukte te bezoargen.
De tonne met ofval wörden alle wekke biej oe achter ’t hoes vothaalt en as ’t schier weer was heurn ie ’s oavonds ’n belleke van de ijkskoman.

‘’t Gung gemeudelik en heanig an allemoal’

’t Gung gemeudelik en heanig an allemoal mear dat bint dinge die oet de tied bint kommen. D’r bint ok leu dee nich noar de supermaarkt hen könt umdat ze d’r gin geald vuur hebt. Dee möt noar de voedselbaank um vuur de hoeshoalding wat etten in hoes te halen. In Eanske, leas ik op wikepedia, bint dat toch nog zo’n 350 hoeshoaldings.

Ik mös doar ok an deanken doo ik in de kraante kon leazen dat alle stukke groond op ’t Vaneker an de man bint bracht, 263 biej mekaar. Biej ’t vroogere Zuudkaamp op ’t vleegveld stoat intusken al heel wat van dee mooie wonningen. As ’t schier weer is rieje ik d’r nog wal ‘s veurbiej met ’t trapiezer. ’t Zut d’r allegaar onmeunig mooi oet. Mear dat möt ok wal waant de prieze van dee wonningen zit toch allemoal in de grötte van een miljoon of ok vaak wal wat hoger.
263 Wonningen met duur mekaar nömmen 3 bewoners, biej mekare zon achthoonderd leu dee doar wont of komt te wonnen. ’t Geet noch nich zo beroerd in Eanske, las ik eargens. Met dee leu nich in alle geval. Mear d’r wont in Eanske biej mekare teagen de 160.00 inwonners en doarvan bint d’r nogal wel dee ‘t ’n stukske meender hebt en mut puzzelen hoo ze alle moanden roond mut kommen. Mear ja, zo is ’t noe eenmoal in de weareld.

Vriedagaovond wörden de vrouwen van FC Twente glorieus kampioen. Dat is wal iets um biej stil te stoan. Op tilvisie hebt ze dat ok wa doan. Zoaterdagsmons zochen ik in de papieren kraant van Tubantia umzeuns noar ’n bericht en n’n foto doaroaver. Helemoal niks! Was ’t Feyenoord wes dan had d’r wisse wal wat in stoan. ’t Is joa n’n Rotterdaamse kraant!

En verdreet in Almelo. Heracles mut d’r oet. Spietig veur eur. Mear d’r kwam biej miej ginne troan. Wal biej Jan Smit!

Tinus Kroeds (reakties: t.kroeds@gmail.com)

Column Tinus Kroeds