Foto:

Tip vuur De Grolsch

Mangs he’j van dee kromme bedeanksels. Dat gebuurt oe eenmoal in de zovöl tied. Ik had dat vergangene wekkeneande. Ik was biej den wedstried van FC Twente zoaterdagaovond teagen Fortuna Sittard (wat was dat trouwens n’n zeperd!).
Ik zat kot biej dee leu van Vak P en zag door slagmoals n’n volle loading bier noar oonder hen kommen. Tjonge, wat n’n dure flikkeriej is dat. Doar wödt toch zekers telkenmoale vuur ’n kapitaal an bier noar oonder hen smetten.
En nich een- of tweemoal, nee vescheidene moale geet d’r vuur ’n kaptoal noar de grösmatte. Dan deank ik, wat ku’j doar ’n schier feeske van en met opbouwen. ’t Is oaverigens nich allenig in De Veste dat dit gebuurt, ok biej aandere wedstrieden is ’t slagmoals n’n biergooierieje.
En ’t zut d’r noar oet dat ’t stöadig ok biej aandere gebuurtenisse vuurkomt. En doo dacht ik: dat is wat vuur De Grolsch. Doar zollen ze op in mötten spöllen met ’n niej bier oet te veenden: smietbier. Dat zol ofvalbier können wean, dat normaal de göt in geet mear dat ze dan könt broeken as smietbier. Dat schöt n’n bölt in de pries. En doarum könt ze d’r dan ok ’n luk meer van goan smieten. Wödt ’t feestke ’n stuk gemeudeliker van. Ik deank dat d’r onmeunig völ vroag noar zal kommen, waant ’t blif dan natuurlik nich eankel vuur ’t voetbal.
De leu könt ’t oaweral vuur gebroeken as ze ’t eargenswoar nich met inverstoan bint. Biej de regering biejvuurbeeld. As d’r een of aandere minister wat verkloart wat neerns op slöt, hupsakee, met ’n stel noar Den Haag hen en dan n’n bölt smietbier oawer zonne beweendspersoon hen smieten.
Of n’n joernalist van de kraant, radio of tilleviesie dee wat schrif of zeg wat de leu nich akkordeert. Efkes noar de supermaarkt ’n poar krätkes smietbier halen en dan meer smieten met dat spöl noar zonne kearl of n’n töatbokse.
’n Vuurbeeld doarvan was d’r zoaterdagoavond al in De Veste. Doar was n’n verslaggeaver van Radio Limburg entoesiast gangs um met ’n bölt plezeer an de leu in Limburg te vertellen dat Fortuna met de buute gung strieken in Eanske. En dat stun n’n anhaanker van FC Twente nich an en, hupsakee, den kearl kreeg n’n stortkoar bier oawer zik hen. Kiek, doar was natuurlik dat smietbier onmeunig gepast vuur wes.
In ’n Bants van vergange wekke vriejdag schreef Fardau Wagenaar d’r ok oawer, dat kraantenschrievers as zee en heure vakbreurs slagmoals onplezerige bosschoppen oawer zik hen kriegt. Kiek, wier zonn angeleagenheid waor as iej met ’n poar man hen keunt goan en n’n plasreagen smietbier oawer zo ene hen keunt streuien.
En zo bint d’r noch wal völ meer angeleagenheden woar as smietbier gepast vuur is. En wat vuur n’n umzet zal dat teweeg brengen vuur De Grolsch. Ik behoof vuur dissen tip niks te kriegen. Is helemoal vuur lauw. Doot d’r met wa’j d’r met wilt!.

(Ik moet oeleu wal zeggen dat, wat ik hierboaven heb schreven, is gebuurt doo ik ’t benul nich helemoal op de riege had. Ik meen d’r natuurlik niks van, mear kan ‘t nich meer terugdreaien. Loat mear goan, geet wal wier oawer).

Hoalt oe good.

Tinus Kroeds

(reakties: t.kroeds@gmail.com)

Column Tinus Kroeds

Meer berichten