Nog ’n joar d’r biej…
Algemeen’t Was ’n peuske spannend en ofwochten mear vergangene wekke is ’t d’r toch wal van kommen. Jan Streuer en Ron Jans blieft noch meenstens tot milden 2023 biej FC Twente um tesamen met noch völ meer aandere technische leu d’r vuur te zoargen dat dee klub oet De Grolsch Veste goode resultoate in de ere divisie blif kriegen.
Tot now too bint zee doar beheurlik in slaagt. Zeg now zölf, op de veerde plek stoan op ietske meer as de haelfte van de kompetitie, wel had dat vuuroet oetedacht. Vergangene joar gung ’t met völ meuite mear dit joar heb ze ’n kroam oardig op de riege.
Doo zee d’r an begonnen, twee joar terugge, zag ’t d’r gaans aans oet. Jan Streuer gung met n’n leuge geldbuudel op pad en knooien zo n’n selektie bie mekaar dee van alle aard spöllers in zik had. Oet verscheidene laande en sproake gaddern hee de jongs biej mekare waorvan d’r ’n poar ’t good hebt doan mear woar as d’r ok wal ’n köppelke deur de korf bint vallen.
Veurigs joar was d’r wat meer ruumte en wörden meender spöllers huurt en kregen d’r ok ’n stel ’n oavereenkumste vuur n’n korte of langere tied. En vanzölf nich vergetten: Oet de eagen joonkheid waren d’r ok wat taleante dee zik andeenden. Alns met mekaar hef dat good oetpakt.
‘Hee löt zik nich andrieven’
Jan Streuer heb ik al metmaakt doo hee nog spöller was biej FC Twente. Dat is a wier meer as vieftig joar terugge. Doo was hee roond de twintg jaor oald mear leur al wal blieken dat hee meer wol dan allenig mear voetbal spöllen. En dat hef zik ok wal oetweezen. Hee is onmeunig röstig en löt zik nich andrieven.
Loat wiej d’r mear van oetgoan dat hee ok vuur tooken joar wier genog en kapoabele spöllers biej mekaar wet te vrösseln um beheurlik biej te blieven in de ere divisie.
Ron Jans is natuurlik n’n traener met onmeunig völ oonderveending. Hee was zölf spöller op ’n hoog nivoo (hee hef zölfs noch ’n paor moal n’n goal maakt teagen FC Twente, foei!) en ok as treaner hef hee n’n bölt oonderveending.
Hee spöllen ’t zölfs kloar um met PEC Zwolle den KNVB Beker te winnen duur in de finale met mear leefst 5-1 te winnen van Ajax.
En ok biej aandere klubs wös hee van anpakken. Hee was zölfs ’n peuske treaner in Amerika woar as hee wier heel aandere oonderveendingen hef opdoan.
Ik deank dat de hoge manleu biej FC Twente d’r good an hebt doan um dee beide kearls nog meenstens ’n joar de technische zeggenschop te loaten hoalen.
Ik wunske ze allemoal völ sukses too.
Um noch efkes biej ’t voetbal te blieven: FC Twente hef beslotten um gin gebroek te maken van ’n anbod van de regering um nich mear as tiendoezend anhangers too te loaten in De Veste.
As zee dat zöllen doon dan mut ze, zo leas ik in de kraante, d’r twee ton biej doon. En ik kan begriepen, dat zee dan dat besloet heb nommen.
’t Zal toch nich lang meer doeren dat alleman d’r wier hen kan?
Hoalt oe good.
Tinus Kroeds
(t.kroeds@gmail.com)
Column Tinus Kroeds
