Teagendroads

Vandage wil ik ’t is met oeleu hebben oawer dee sporters dee onwiezig dwers goat liggen. Dee zik nich wilt hoalen an de reagels zoas dee veur alle leu geald. Doar heb wiej bievuurbeeld den tennisspöller oet Servië, Novak Djokovic. Den wil geern metdoon an dee tenniswedstrieden in Australië.
Hee is doar henne goan zoonder dat hee wil zeggen of hee de koronaprikken hef had. En ai’j dat nich goat zeggen, dan wördt d’r annommen da’j nich bint ineant. En dan dörv iej Australië nich inkommen. Zee hebt ‘m dus doar eargens in ’n hotel zet en noe möt hee ofwochten of hee d’r blieven mag. Dat hebt ze vergangene moandag bekekken (ik schrief dit vertealsel op zundag!).
Bin beniejd wat doar oet is kommen. Mear ’t is rechttoo dat reagels veur elkeen geald. Ok veur Djokovic. Zien vaar is in ServIë doanig te keer goan en vergeleek ziene zön met Jesus. Geet mie wal ’n betke te wied.

Dan ha’j veurige wekke ok dat jong dat zo hard kan schaatsen, Patrick Roest. Hee mag nich metdoon an ‘n ofstaand biej de Olympische Spöllen en dat stun ‘m nich helemoals an. Doar gung hee ok doanig oawer te keer. Mear as d’r van boaven op n’n verduudelijke groond ’n besluut wördt nömmen dan heb iej oe doar biej daal te leggen. Of nich dan?

‘D’r kwam exstroa n’n vleegmasien oawer’

D’r bint ok n’n rieje voetbalklubs dee zich wollen vuurbereiden in ’t boetenlaand, woar as ’t weer stoadiger is as biej oons. Mear dat gung biej Ajax helemoals mis. D’r kregen ’n stuk of wat spöllers korona en zee hadden mötten wetten dat dee jongs plaatselik in karantaine hadden mötten goan. Mear wat hebt ze doan? D’r kwam exstroa n’n vleegmasien oawer um dee besmette jongs noar Amsterdam hen te brengen. Dat is dwers teagen de reagels in en doar krieg iej duur ’n reagel n’n boot vuur an ’t gat. Mear zee komt d’r of met ’n rampelemeant van Hugo de Jonge, een van ziene laatste akties as baas van de gezoondheid.

Mear d’r is ok noch wal ’n betke good niejs. Ramiz Zerrouki, dat goode voetbalspölleker van FC Twente, mag met doon met zien laand Algerije aan de Afrika Cup. Dat is onmeunig mooi vuur dan jong en dat is ‘m hertelijk gönnt. ’t Is allenig beroerd vuur FC Twente woar as hee ‘n köppeleke wedstrieden mankeert. En iej mut d’r nich vrömd van opkieken as kommende vriejdag de kommissie ’n besloet nemt um Michal Sadilek oet te sloeten vuur ’n zetke umdat hee kortens iets hef doan teagen Utrecht wat hee eanliks nich doan hef. Hee deed joa ietskes wat slagmoals gebuurt en woar as n’n scheidsrechter niks döt of hoogoet n’n gelle kaart vuur gef. Ofwochten mear vriejdag. En as d’r ’n poar goode spöller nich biej bint, mut dee aandern meer ’n taandje toozetten.

In elk geval is vergange en geet ’t kommende wekkeneande wier an. Jammer dat wiej d’r noch nich noar too könt umdat den koronakroam dat nog teagenhoalt. Ai’j ’n abonnement hebt köj ’t op tillevisie bekieken, aans möj ’t doon met de radio, met wat körte stukskes op tillevisie of moandag in de kraante. Goodgoan.

Tinus Kroeds (t.kroeds@gmail.com)

Column Tinus Kroeds

Meer berichten