Voetbal, bier en pandemie

Hee keump oet Mexico, in 2013 hebt ze ‘m biej FC Twente inhaalt. Hee spöllen doar 51 wedstrieden en scheut den bal 13 moal in ’t loek.
Noa 3 joar hebt ze ‘m votdoan noar Porto in Portugal veur n’n beheurliken buul ceanten. Hee is now achtentwintig joar en as ze ‘m doar van de haand doot schoeft ze biej FC Twente ok nog n’n toeten met geald achter de duur hen. Wee dat is? Jésus CORONA, voloet Jésus Manuel Corona Ruiz. Veurigs joar spöllen hee nog teagen Nederlaand met zien laand Mexico.

‘t Keump oet Mexico, ’t zit in fleskes met n’n kroonkörk d’r op, d’r zit 4,5% alcohol in en ’t smaakt bliksems mooi. ’t Is ’n lager bier en wördt brouwen biej de Grupo Modelo brouweriej. Hoo ’t het? CORONA.

’t Keump oet China (zegt ze), ’t Is n’n onplezeerige zeekte dee zik oawer de hele wearld hef oetspreid. D’r wördt onmeunig völ leu behoorlijk kraank van en d’r bint d’r ok al heel völ met oet de tied kommen. Hoo ’t het? CORONA.

‘Ze wilt zo geern dat alleman zich löt prikken’

Van dee laankwielige zeekte heb wiej noe al meer as 2 joar last en ’t hoalt nich op. Vandaag-an-‘n-dag haalt ’t wier alderbastens an en wiej hebt veniejs allerhaande bosschoppen met kreegen van oonze bazen oet Den Haag. Ze wilt zo geern dat alleman zik löt prikken en dat dan op de mobiele löt zetten of op ’n breefke.
As dat meer zöl gebuurn zol ’t laank nich zo arg waen en könt wiej d’r noch wal ’n moal vanof kommen. Dat zegt tenmeesten de leu dee doar vuur hebt duurstudeert.

Bliksems onplezerig is ’t natuurlik dat wiej wier zo’n käpke op ’n snoeten mut doan, n’n eand van mekaar mut ofblieven, dat de kafees (ok wal godshuusken neumt) al vroog de duur too mut doon, iej dörvt nich meer as veer leu in ’t hoes loaten en biej de sportwedstrieden magt d’r geels nich ene hen kommen.
In plaats van dartigdoezend leu is d’r teagen Feyenoord gin ene in De Veste. Ze bint wal an ’t steggeln um ’t aans te doon mear doarvan weet ik noch niks as ik disse kollumn an ’t schrieven bin.

’t Zol natuurlik gaaf wean as dee ongeprikten, woarbiej ’t kan, zo völ möglik eer aarm oetstaken um d’r zonne naold in te loaten prikken. Dan bint wiej al van n’n bölt beroedigheid of. En dan behoovt d’r zowat gin een in karrantaine en kunt wiej wier wat vriejer deur ’t leaven goan.

Oaverigens, dee leu dee now n’n anzet doot um n’n nieje regering biej mekaar te knooien bint ok al ’n poar moal ‘in karrantaine’ wes in een of aander kasteel.
Dat bint leu dee mekaar veur alns wat mooi en lillik is hebt oetemaakt, völ dingen hebt zegt dee nich woar bint (also onwoarheid sprekken, leegen en gin heugenis eargens mear an hebben) en hebt zegt dat ze absloet nich meer met mekaar wollen umgoan. Zee bint zölfs allemoal oftreden umdat ze de zaken verslatert hebt.

En deezölfde leu zit now biej mekaar op de slippe en wilt wier veniejs met mekaar de baas wean. Begriep iej d’r iets van?

Tinus Kroeds

Column Tinus Kroeds